Виктор Рассадин финалга таҕыста

Красноярскайга икки төгүллээх олимпийскай чөмпүйүөн Иван Ярыгин кэриэһигэр тустууга норуоттар икки ардыларынааҕы турнир салҕанар. Хапсыһыылар эр дьоҥҥо – 57, 61 уонна 70 кг ыйааһыннарга ыытылыннылар.

Кытаанах хапсыһыылар түмүктэринэн, Виктор Рассадин үчүгэй тустар таһымыгар сылдьарын көрдөрдө. Кини утуу-субуу китаец Йерболаты 10:0, дагестанец Исубгаджиевы ыраастык, бэйэтин бииргэ эрчиллэр доҕорун Айсен Потаповы (иккиэн тренер А.К. Константинов салалтатынан дьарыктаналлар) 9:2 уонна финалга тахсар иһин киирсиигэ дагестанец Далгатовы 7:0 ахсааннарынан эрэллээхтик кыайталаата. Манна кини ордук утарсааччыларын партерга түһэрэн баран “растяжка” диэн, ууннары тардар албаһы сатабыллаахтык туттубута, кыайыылаах буолла. Дьэ, сөбүлээн туттуллар албас (коронка) туһата итиннэ сытар. Бүгүн быһаарыылаах хапсыһыыга Виктор – осетин Давид Баевы кытта утары тахсыаҕа.

Биир улахан үөрүйэхтээх тустуукпут, Европа уонна аан дойду чөмпүйэнээтин боруонса призера Арыйаан Тютрин 57 киилэҕэ боруонса мэтээл иһин тустуоҕа. Кини ордук, уруккуттан эриһэр утарсааччыта, дагестанец Рамиз Гамзатовы ыраастык кыайбытын бэлиэтиэххэ сөп.

Ити курдук, бүгүн Артем Слепцов, Лев Павлов (57 кг), Александр Авелов (61 кг) уонна Айсен Потапов (70 кг) “санааны уоскутар” бөлөххө тустуохтара, диэн  “Дьулурҕан” хаһыат иһитиннэрэр.

Финалга көрсүөхтэрэ:

• 57 кг Мунх-Эрдэнэ Батхуяг (Монголия) – Муса Мехтиханов (Арассыыйа);
• 61 кг Чермен Тавитов – Кежик Монгуш (иккиэн Арассыыйа);
• 70 кг Виктор Рассадин (Таджикистан) – Давид Баев (Арассыыйа).