Виктор Рассадин тустууга Олимпиада полуфиналиһа буолары ситистэ

Бүгүн, атырдьах ыйын 9 күнүгэр,  Париж куоракка ыыттылар Олимпиадаҕа  74  киилэҕэ диэри ыйааһыннаахтарга көҥүл тустууга Виктор Рассадин Кытай бөҕөһө Лу Фэны кыайан полуфиналга таҕыста.

Виктор Рассадин  7:4 очконан Кытайтан Лу Фэны кыайда!

Олимпиадаҕа саха спортсмена Виктор Рассадин бу иккис кыайыыта, кини бу иннинэ Грецияттан Георгеос Кугумцидиһы кытта киирсэн кыайыылаах тахсыбыта. Салгыы саха спортсмена финалга тахсар иһин киирсиэҕэ. Полуфиналга аан дойдутааҕы Кубок хаһаайына Узбекистан бөҕөһө Разамбек Жамаловы кытта Саха сирин бириэмэтинэн бу түүн 01.30 чааска киирсиэҕэ.

Санаттахха, быйыл отут үһүс төгүлүн ыытыллар Олимпийскай оонньууларга биэс  саха спортсмена кытталлар: Айаал Лазарев (Кыргызстан), Виктор Рассадин (Таджикистан), Владимир Егоров (Македония), Георгий Окороков (Австралия), ону тэҥэ Сардаана Трофимова (Кыргызстан). Айаал Лазаревтан ураты спортсменнар бары Олимпиадаҕа аан бастакытын кытталлар, оттон кини Олимпиадаҕа быйыл үһүс төгүлүн күрэхтэстэ.