Виктория Петрова Швейцарияҕа икки кыһыл көмүс мэтээлинэн бэлиэтэннэ
![](https://sakha-sire.ru/wp-content/uploads/2024/06/2024-06-08_16-33-28.jpg)
Чэпчэки атлетикаҕа саха спортсменката Виктория Петрова Швейцарияҕа норуоттар икки ардыларынааҕы турнир икки төгүллээх кыайыылааҕа буолла.
Бу күрэхтэһии аан дойду старт-илииһигэр киирсэр кыаҕы биэрдэ, билигин спортсменка Паралимпийскай оонньууларга кыттар бырааптаах. Бу туһунан Саха сирин сүүмэрдэммит хамаандаларын успуорка бэлэмниир киинигэр иһитиннэрдилэр.
Виктория Петрова успуорт икки көрүҥэр (диискэни быраҕыы уонна ядрону анньыы) кыһыл көмүс мэтээли ылан, норуоттар икки ардыларынааҕы турнирга ситиһиилээхтик кытынна.
«Күрэхтэһии сүрүн сыала ситиһилиннэ — аан дойдутааҕы функциональнай кылаас ылылынна уонна аан дойдутааҕы старт-илиискэ киирэн, билигин Парижка Паралимпийскай оонньууларга толору кыттар кыахтанныбыт», — диэн Саха сирин сүүмэрдэммит хамаандатын старшай тириэньэрэ Василий Оленов кэпсээтэ.
Сүрүн киирсии Виктория Петрованы от ыйын 15-20 күннэригэр Чебоксар куоракка ыытыллар Арассыыйа чөмпүйэнээтигэр күүтэр. Чопчу бу күрэхтэһии Паралимпийскай оонньууларга дойду сүүмэрдэммит хамаандатын састаабын быһаарар.
Сообщить об опечатке
Текст, который будет отправлен нашим редакторам: