Виктория Трифонова: «Аан дойдутааҕы таһымнаах күрэххэ кыттыбыппыт туспа ураты өйдөбүлү хаалларда»

«Азия оҕолоро» норуоттар икки ардыларынааҕы оонньууларга Саха сирин бастакы хамаандата чэпчэки атлетикаҕа үчүгэйдик кытынна.

Бүгүн чэпчэки атлетиканы түмүктүүр доҕордоһуу эстафетатыгар араас хамаандалартан хомуллан түөртүү киһи сүүрдэ. Онно Саха сирин бастакы хамаандатын спортсмена Виктория Трифонова үрүҥ көмүс мэтээли ылары ситистэ. Кини доҕордоһуу эстафетатыгар Кыргызстан, Узбекистан уонна Казахстан хамаандатын кыргыттарын кытары сүүрдэ. Виктория «Азия оҕолоро» оонньууларга хайдах кыттыбытын туһунан бу курдук кэпсээтэ:

— Бүгүн мин 4х400 эстафетаҕа кытынным, 4-с этапка сүүрдүм. Бастакы түһүмэххэ үсүһүнэн иһэммит, биир кыыспыт бытааран, ситтэрэн, төрдүс буоллубут. Инники кыыспыт аһара арыттаахтык сүүрэн, кэнники буоламмын сатаан сиппэтим. Дьиҥэ бары тэҥ тэтимнээхтик сүүрбүппүт. Ол эрээри күрэхтэһии түмүгүнэн үрүҥ көмүс призер буоллум, онтон олус үөрдүм.

«Азия оҕолоро» норуоттар икки ардыларынааҕы оонньуулар күрэхтэһиилэрэр интэриэһинэйдик ааһан эрэллэр, аан дойдутааҕы таһымнаах күрэххэ кыттыбыппыт туспа ураты өйдөбүлү хаалларда. Элбэххэ үөрэннибит, уопут ыллыбыт, мантан сиэттэрэн өссө үрдүк чыпчаалларга дьулуһар санаа киирдэ.