Вильям Иванов: «Арассыыйа Дьоруойа буолбут уолаттарбытынан киэн туттабыт, сүгүрүйэбит!»

Бу сарсыарда Саха сирин бар дьоно уолаттарбыт Арассыыйа Дьоруойа буолбуттарын туһунан олус үчүгэй сонуну истибитинэн-аахпытынан турдулар.

Вильям Очирович Иванов, Саха Өрөспүүбүлүкэтинээҕи сэрии, үлэ, Сэбилэниилээх күүстэр уонна быраабы араҥаччылыыр уорганнар бэтэрээннэрин (биэнсийэлээхтэрин) уопсастыбаннай тэрилтэлэрин бэрэссэдээтэлэ бэйэтин санаатын үллэстэр:

— Бүгүн сарсыарда олус үчүгэй сонун Саха сирин тилийэ көттө, «Алеша» тааҥка экипаһа, ол иһигэр биһиги уолаттарбыт дойду саамай үрдүкү наҕараадатын – Арассыыйа Дьоруойун сулуһун Владимир Путинтан туттулар. Биһиги бары онтон олус үөрдүбүт.

Оҕолору патриотическай иитиигэ үлэлэһэ сылдьар дьоҥҥо, биһиэхэ, олус кэрэхсэбиллээх. Бу иннинэ биһиги ыччаты, кинилэр хос эһээлэрин, Аҕа дойду Улуу сэриитин кыайыылаахтарын холобурунан иитэр эбит буоллахпытына, аны аныгы кэм, бэйэлэрин аттыларыгар сылдьар, биир дойдулаахтарын, байыаннай дьайыы кыттыылаахтарын, биһиги дьоруойдарбыт туһунан кэпсиэхпит. Маныаха учууталлар, төрөппүттэр, кинилэри маннык үтүө санаалаах, хорсун-хоодуот буолалларыгар ииппит-такайбыт дьон көмөлөрө көдьүүстээх буолуоҕа.

Бу хорсун-хоодуот буойуттарбыт Аҕа дойдуларын, ийэ сирдэрин таптыыр, киэн туттар, бэриниилээх буоланнар, хорсун быһыыны көрдөрдөхтөрө. Биһиэхэ билигин оҕону-ыччаты кытары үлэлиирбитигэр холобур буолар, дойдуларыгар бэриниилээх, хорсун, дьоруой уолаттардаахпыт. Биһиги бары кинилэринэн киэн туттабыт, сүгүрүйэбит.