Вилюй эһэчээн Екатеринбург куоракка көттө

Колымана уонна Ломоносов үрүҥ эһэлэр «Орто дойду» зоопаркаҕа төрөөбүт  оҕолоро Яналаах Вилюй номнуо биир саастарын туоллулар.

Эһэ оҕолоро улаатаннар, Вилюй эһэчээн «Якутия» АХ көтөр аалынан  ахсынньы 22 күнүгэр Дьокуускай — Екатеринбург рейсинэн  саҥа дьиэтигэр — Екатеринбургдааҕы зоопаркаҕа айаннаата.

Санатар буоллахха, «Роснефть» хампаанньа «Орто дойду» зоопаркаҕа баар үрүҥ эһэлэргэ көмөлөһөн «шефтэһэр». Колымана уонна Ломоносов оҕолоругар ааты талыы быйыл саас ыытыллыбыта.  «Роснефть» хампаанньа «ВКонтакте» социальнай ситимин сирэйигэр куоластааһын түмүгүнэн  дьон 40%-ра Вилюй уонна Яна диэн ааты талбыттара.