Виртуоз-хомусчут Дьүрүйээнэ Полад Бюльбюль оглы бэстибээлигэр кытынна

Аан дойду виртуоз-хомусчута, этно-ырыаһыт, муусукаан Юлиана Кривошапкина-Дьүрүйээнэ Азербайджан Шуша куоратыгар түүр норуоттарын култуураларын «Хары-Бюльбюль-2023» аан дойдутааҕы бэстибээлигэр кытынна.

Дьүрүйээнэ 1989 сылтан ыытыллар бэстибээлгэ кыттыбытын туһунан маннык кэпсээтэ:

«Мин ийэм Евдокия Петровна  уонна кини көлүөнэтэ олус сөбүлүүр, номоххо киирбит ырыаһыты илэ көрсөн дьоллоннум.

Улахан бэстибээлгэ ыҥырыллыбыппыттан уонна үтүөкэннээх сыанаҕа оонньообуппуттан ис сүрэхпиттэн үөрдүм.

Бэстибээли Арассыыйаҕа Азербайджан посола, Азербайджан Өрөспүүбүлүкэтин култууратын урукку миниистирэ, эстрада ырыаһыта, композитор, педагог, артыыс, искусствоведение доктора, бэрэпиэссэр, дипломат, бэлитиичэскэй уонна уопсастыбаннай диэйэтэл Полад Бюльбюль оглы көҕүлүүр.

Бэстибээл ыам ыйыгар Шушаҕа үүнэр уонна бу куорат бэлиэтинэн буолар Хары-бюльбюль сибэкки аатынан ааттанар».