«ВИС» бөлөх Дьокуускайга Өлүөнэ күргэтин тутууга анал тиэхиньикэни аҕалла

«ВИС» бөлөх Өлүөнэ күргэтин тутууга үлэтин салгыыр.

Дьокуускайга иккис буровой массыына уонна автокран аҕалылыннылар. Эбэ уҥа кытылыгар сыбаайалары түһэрии саҕаланыа. Сыбаайаларга тимир каркастара бэлэмнэннилэр, бастакы конструкциялары туруоруу үлэтэ чугастааҕы күннэргэ саҕаланыа. Күргэни тутууга конструкциялары оҥоруу үлэлэрэ өрүс икки кытылынан тэҥҥэ оҥоһуллуохтара. Бырайыагынан күргэҕэ киирии суол уҥа кытылга саамай уһун уонна 19 тирэхтээх. Ону тэҥэ халаан уута ылбатыгар суоттанан, Тамма үрэҕи көһөрүүгэ үлэ ыытылла турар — бу үлэ 50%-нын кэриҥэ толоруллубут — 127 тыһыынча кубометр буортан 61 тыһ. куб. кутулунна.

Хаҥас кытылга күргэ сыбаайаларын туруоруу салҕанар, тимир каркастарын сыбааркалыыллар. Бетоннааһыҥҥа Саха сирин тыйыс тымныы усулуобуйатыгар анаммыт анал бетон туһаныллар. Технологияны тутуһууга ордук тымныы күннэргэ быстах кэмҥэ үлэ тохтотуллар. Ону сэргэ өрүс уҥа кытылыгар пилоннары оҥорорго коффердам элеменнэрин эмиэ тиэйии ыытыллар — 1144 туонна тимир конструкция тиэйилиннэ.

Өлүөнэ күргэтин тутуу Арктика зонатын килиимэтин уратыларын учуоттуур уонна муҥутуур намыһах салгын температуратыгар салҕанан барар. Бу ирбэт тоҥ сиригэр бастакы вантовай күргэ буолар — уопсай уһуна 4,6 км, оттон тырааныспарынан туоруур уһуна 14,5 км. Күргэ конструкцията 284,5 м диэри үрдүктээх үс пилонтан турар.

Бырайыагы олоххо киллэрии концессионнай сөбүлэһии быһыытынан оҥоһуллар, онно концессионер уонна инвестор быһыытынан «ВИС» бөлөх буолар, оттон концеденынан — Саха сирин Бырабыыталыстыбата. Күргэ Арассыыйаҕа биир бөдөҥ инфраструктурнай бырайыага чааһынай инвестициялары кыттыһыннаран олоххо киллэриллэр.
Бу бырайыак Саха сирин инфраструктуратын сайыннарыыга дьоһун хардыынан буолуоҕа.