Виталий Акопов СӨ Тутууга миниистири солбуйааччынан ананна

Ил Дархан Айсен Николаев ыйааҕынан Виталий Робертович Акопов Саха Өрөспүүбүлүкэтин Тутууга миниистири солбуйааччынан ананна.

Виталий Акопов үрдүк үөрэхтээх. 1983 сыллаахха генерал А.И. Антонов аатынан Ленинградтааҕы Байыаннай-топографическай училищены бүтэрбитэ, 1993 с. В.В. Куйбышев аатынан Ленин Кыһыл Знамята уордьаннаах Байыаннай-инженернэй академияны бүтэрбитэ.

Үлэтин ССРС оборуонатын министиэристибэтин 99-с Эрэдээксийэлиир-таһаарар отделын эписиэрин дуоһунаһыттан саҕалаабыта. Киин 439-с Киин экспэримиэнниир байыаннай-топографическай фабрикаҕа эписиэринэн, Байыаннай университет байыаннай бэлэмнэнии кафедратын преподавателинэн үлэлээбитэ.

2004 сыл кулун тутар ыйыттан Виталий Акопов Москубаҕа баар «Фабер» ХЭУо тутууга дириэктэринэн, 2007 сылтан «Еврострой» САУо дириэктэринэн анаммыта. 2008 сылтан 2019 сылга диэри «ИнжСтройЭксперт» САУо генеральнай дириэктэринэн үлэлээбитэ.

2019-2022 сс. Виталий Акопов «Союзпромниипроект» АУо кылаабынай инженерэ, «Ростех»-«Технодинамика» АУо сүбэһитэ уонна «Арассыыйа Казначействотын үлэтин хааччыйыы киинэ» ФКУ кылаабынай инженерэ.