Витим – Кангаласс учаастагынан уу таһыма үрдүүр

Халлаан сылыйан, хаар ууллан, аны өрүстэр эстэллэрин, муус барыытын кэтээһин-манааһын саҕаланна.

Өлүөнэ тардыытынааҕы уу салалтата иһитиннэрбитинэн, ыам ыйын 2 күнүнээҕи кэтээн көрүүнэн, Өлүөнэ өрүс мууһун алын кирбиитэ Саха сирин кыраныыссатыттан – Ленскэй Витимиттэн 342 км тэйиччи бэлиэтэнэр.

Ол курдук Өлүөнэ өрүс алын кытыыта Иркутскай уобалас Петропавловскай сэлиэнньэтин таһынан баар. Өлүөнэ өрүс Витим – Кангаласс учаастагынан уу таһыма сууккаҕа 20 см диэри үрдүү турар.

Алдан өрүс былаһын тухары уу таһыма эмиэ үрдүү турар. Сууккаҕа 29 см диэри үрдээбитэ, мууһунан сытара бэлиэтэнэр.

Оттон Амма өрүс үөһээ уонна аллараа сүүрүгэр ырбыылаабыта көстөр. Сорох учаастагынан муус миэстэтигэр хамсаабыта бэлиэтэнэр.

Бүлүү өрүс Кириэстээх – Хатырык Хомо учаастагар уу таһыма сууккаҕа 15 см диэри үрдээбит, муус турар. Хоту уонна хотугулуу-илин өрүстэргэ муус билигин даҕаны кыһыҥҥылыы сытар.