Владимир Балынец аан дойду чөмпүйэнээтигэр Арассыыйа сүүмэрдэммит хамаандатыгар ыҥырылынна

Арассыыйа үтүөлээх маастара Владимир Балынец пауэрлифтиҥҥэ аан дойду чөмпүйэнээтигэр кыттарга бэлэмнэнэр. Бу күрэхтэһии Арассыыйа паралимпийскай сүүмэрдэммит хамаандата тоҕус сыл иһигэр бэйэтин былааҕынан уонна гимнинэн кыттар бастакы күрэхтэһиилэриттэн биирдэстэрэ буолуоҕа. Бу туһунан Өрөспүүбүлүкэтээҕи сүүмэрдэммит хамаандалары успуорка бэлэмнээһин киинигэр иһитиннэрдилэр.

Тирэх-хамсатар аппараттара кэһиллиилээх күрэсчиттэргэ аан дойду чөмпүйэнээтэ Каир куоракка (Египет) ыытыллыаҕа. Саха сирин уонна Арассыыйа сүүмэрдэммит хамаандаларын флагмана Владимир Балынец алтынньы 15 күнүгэр кыттыаҕа. Кини дойду чиэһин 49 киилэҕэ диэри ыйааһыннаахтарга көмүскүөҕэ.

Мэтээл иһин Азербайджан, Бразилия, Кытай, Куба, Египет, Испания, Франция, Греция, Япония, Мексика уонна да атын элбэх дойду күрэсчиттэрэ киирсиэхтэрэ.

Санатан эттэххэ, быйыл балаҕан ыйыгар Арассыыйа Паралимпийскай кэмитиэтин бырааба сөргүтүллүбүтэ. Пауэрлифтиҥҥэ аан дойду чөмпүйэнээтигэр дойду сүүмэрдэммит хамаандата бэйэтин былааҕынан кыттыаҕа. Арассыыйа крэсчиттэрэ кыайар түбэлтэлэригэр наҕараадалааһын дойду гимнинэн доҕуһуолланыаҕа.