Владимир Балынец Пекиҥҥэ Аан дойду Куубагын кыһыл көмүһүн ылла

Арассыыйа успуордун үтүөлээх маастара Владимир Балынец дойду сүүмэрдэммит хамаандатын састаабыгар Аан дойду Куубагар ситиһиилээхтик кытынна.

Аан дойду күүстээх пауэрлифтердарын күрэхтэһиитэ Пекиҥҥэ ыытылынна. Бу туһунан «Триумф» пресс-сулууспата иһитиннэрэр.

Саха спортсмена сытан эрэ ыараханы анньыыга 49 киилэҕэ диэри ыйааһыҥҥа Арассыыйа чиэһин көмүскээтэ. 160 киилэни анньыыга кини үрүҥ көмүс мэтээл хаһаайына буолла. Оттон үс холонуутун түмүгүнэн Балынец Аан дойду Куубагын кыайыылааҕа буолан, успуорт карьератыгар өссө биир ситиһиини оҥордо.

Сүһүөхтэрэ кэһиллиилээх спортсменнар ортолоругар Аан дойду Куубагар 23 дойдуттан 160-ча атлет кытынна. Оттон Арассыыйа сүүмэрдэммит хамаандатыттан 13 бастыҥ спортсмен кытынна.