Владимир Балынец уонна Арассыыйа үтүөлээх тириэньэрэ Петр Давыдов Дьокуускайга кэллилэр

Бүгүн Дьокуускайга Владимир Балынец уонна Арассыыйа үтүөлээх тириэньэрэ Петр Давыдов кэллилэр. Кинилэри Өрөспүүбүлүкэтээҕи сүүмэрдэммит хамаандалары успуорка бэлэмнээһин киинин дириэктэрэ Михаил Пахомов, солбуйааччыта  Владимир Карпенко үөрүүлээх быһыыга-майгыга көрүстүлэр. Владимир Балынец дойду паралимпийскай сүүмэрдэммит хамаандатын састаабыгар киирэн, пауэрлифтиҥҥэ аан дойду чөмпүйэнээтин үрүҥ көмүс мэтээлин ылбыта.

Сааҥсыйлартан уһун тохтобул кэнниттэн наҕараадалааһын сиэригэр-туомугар аан бастакытын Арассыыйа былааҕа өрө күөрэйбитин туһунан  Өрөспүүбүлүкэтээҕи сүүмэрдэммит хамаандалары успуорка бэлэмнээһин киинин пресс-сулууспата иһитиннэрбитэ.

Аан дойду чөмпүйэнээтэ  алтынньы 9 — 18 күннэригэр Египекка, Каир куоракка, ыытылла турар. Владимир Балынец 49 киилэҕэ диэри ыйааһыҥҥа дойду чиэһин көмүскээтэ. Үс холонуу түмүгүнэн, бастакы миэстэни Бразилия бэрэстэбиитэлэ Круз Ма де Оливейра 515 киилэ түмүктээх ылла. Иккис миэстэҕэ Владимир Балынец 483 киилэ көрдөрүүлээх таҕыста. Оттон үһүс миэстэ Кытай күрэсчитигэр Ли Ван Гоҥҥа (464 кг) тигистэ.