Владимир Колокольцев Дьокуускайга ИДьМ эбийиэктэригэр сырытта

РФ Ис дьыалаларын миниистирэ, полиция генерала Владимир Колокольцев Саха сиригэр оробуочай сырыытынан сылдьар. Кини СӨ Ил Дархана Айсен Николаевы кытта Дьокуускайга өрөспүүбүлүкэтээҕи ИДьМ Судаарыстыбаннай өҥөнү оҥорор кииҥҥэ сырытта. Бу туһунан СӨ Ил Дарханын уонна Бырабыыталыстыбатын пресс-сулууспата иһитиннэрэр.

Владимир Колокольцев тэрилтэ сүрүн үлэтин хайысхаларынан салаалар салайааччыларын дакылааттарын иһиттэ. Санаттахха, киин дьиэтэ эрэгийиэн бүддьүөтүн суотугар атыылаһыллыбыта. Манна миграция боппуруостарыгар уонна Судаарыстыбаннай автоинспекция (ГАИ) салаалара киирэллэр.

Бу кииҥҥэ пааспар, суоппар дастабырыанньатын ылыахха, тырааныспары учуокка туруоруохха уонна да атын өҥөлөрүнэн туһаныахха сөп. Ону таһынан, тырааныспары ыытар быраапка эксээмэн туталлар.

ИДьМ миниистирэ судаарыстыбаннай өҥө хаачыстыбатын уонна түргэн-тарҕан буолуутун үрдэтиигэ, ону тэҥэ каадырдары бэлэмнээһиҥҥэ актуальнай соруктарга болҕомтотун уурда.

«Судаарыстыбаннай өҥөнү оҥорор киин сүрүн соруга – уочарат суох буолуута. Дьон судаарыстыбаннай өҥөнөн туһанаары кэлэн, Киин үлэтигэр үҥсүүтэ-харсыыта суох ылыахтаахтар», – диэн Арассыыйа ИДьМ баһылыга бэлиэтээтэ. Салайааччылар ону таһынан Саха сиринээҕи ГАИ устуоруйатын түмэлигэр сырыттылар. Владимир Колокольцев түмэл экспозициятын кытта болҕойон билсэн баран, 1951 сылтан ГАИ-ҕа 30-тан тахса сыл үлэлээбит автоинспектор Дмитрий Николаевич Алексеевка Дьокуускайга пааматынньыгы туруоруу көҕүлээһинин өйөөтө.

Миниистир улахан интэриэһин түмэлгэ ГАИ үлэһиттэрэ – байыаннай дьайыы кыттыылаахтара бэлэхтээбит эспэнээттэрэ тарта. Киниэхэ байыастарын тэриллэрин, хаартыскаларын уонна трофейдарын көрдөрдүлэр.

Оробуочай сырыытын кэмигэр Владимир Колокольцев ону таһынан Элбэх өҥөнү оҥорор миграция киинигэр уонна Омук дьонун социальнай уонна култуурунай адаптациятын киинигэр сылдьан, тэрилтэлэр материальнай-тэхиниичэскэйй баазаларын уонна үлэлэрин тэриллиитин кытта билистэ.

Киин үлэ миграциятын хайысхатынан судаарыстыбаннай өҥөлөрү оҥорор, ол иһигэр омук дьоно уонна гражданствота суох дьон РФ сиригэр-уотугар үлэлиир кыахтарын туһугар патены оҥорор уонна биэрэр.

ИДьМ миниистирэ Владимир Колокольцев омук дьонун кытта тиһиктээх уонна комплекснай үлэни хааччыйар сыалтан атын быраабы араҥаччылыыр биэдэмистибэлэри уонна Арассыыйа национальностар дьыалаларыгар Федеральнай ааҥыныстыбатын кытта бииргэ үлэлээһини тэрийиигэ хас да сорудаҕы биэрдэ.

Владимир Колокольцев тэриллии үрдүк таһымын, аныгылыы хааччыллыытын уонна сылдьааччыларга табыгастаах усулуобуйаны бэлиэтээтэ уонна маннык кииннэр биһиги гражданнарбытыгар судаарыстыбаннай өҥө хаачыстыбатын уонна тиийимтиэтин биллэ үрдэтэллэрин эттэ.