Владимир Модосян тустууктары — Лев Павловы уонна Константин Капрынову дьарыктыаҕа

Ил Дархан, эрэгийиэн көҥүл тустууга федерациятын бэрэсидьиэнэ Айсен Николаев ааспыт өрөбүлгэ Арассыыйа көҥүл тустууга сүүмэрдэммит хамаандатын страшай тириэньэрин, аан дойду чөмпүйүөнүн Владимир Модосяны кытта көрсөн, успуорт бу көрүҥүн сайыннарыы туһунан кэпсэттилэр. 

Айсен Николаев өрөспүүбүлүкэҕэ көҥүл тустуу маассабай уонна дьон сэҥээрэр көрүҥүнэн буоларын бэлиэтээтэ.

«Саха тустуутугар саҥа «алмаастар» бааллар. Бу Лев Павлов, Константин Капрынов уо.д.а. инникилээх спортсменнардаахпыт. Айылҕаттан бэриллибит талаан чөмпүйүөннүү түмүктээх буоларыгар күүс уонна майгы-сигили эрэ итэҕэс буолуо. Мин санаабар, үрдүк кылаастаах тириэньэри кытта үлэ наада», — диэн Айсен Сергеевич эттэ.

Владимир Модосян уопутун Саха сирин тустууктарын кытта үллэстэргэ бэлэмин, тирэхтээх бэлэмнээхтэрин уонна кэскиллээхтэрин үрдүктүк сыаналаата. Кини хамаанда лиидэрин Лев Павловы уонна хамаанда хапытаанын Константин Капрынову бэлиэтээтэ.

«Мин бу ыччаты кытта Арассыыйа сүүмэрдэммит хамаандатыгар үлэлээбит уопуппун үллэстиэм этэ. Тоҕо диэтэр, манна улахан ситиһиилэр кэлэллэригэр туох баар күүһү уонна кыаҕы ууралларын мин билэбин», — диэн тириэньэр эттэ.