Владимир Путин Аҕа дойдуну көмүскээччи сылын тэрийэр туһунан Ыйаахха илии баттаата

РФ Бэрэсидьиэнэ Владимир Путин тохсунньу 17 күнүгэр 2025 сылга Аҕа дойдуну көмүскээччи сылын тэрийэр туһунан Ыйаахха илии баттаата. Докумуон нуормалыыр-быраап аахталарын порталыгар таҕыста.

Санаттахха, Владимир Путин 2025 сылы Аҕа дойду көмүскээччи сылынан биллэрэргэ былырыын ахсынньы бүтүүтэ Судаарыстыбаннай Сэбиэт мунньаҕар иһитиннэрбитэ. Бэрэсидьиэн ол туһунан Улуу Кыайыы 80 сыллаах үбүлүөйүн бэлиэтэнэринэн сибээстээн этии көтөхпүтэ. «2025 сылга Российскай Федерацияҕа Аҕа дойдуну көмүскээччи сылын ыытарга уураахтыыбын», — диэн Ыйаахха суруллубут.

Бэрэсидьиэн дьаһалтатыгар тэрийэр кэмитиэти  уонна сыл тэрээһиннэрин ыытыыга дирекцияны тэрийэргэ сорудахтаата (дьаһалта баһылыга Антон Вайно). Ону таһынан тэрээһин былааннара бигэргэниэ.