Владимир Путин «айтишниктары» кытта кэпсэттэ

Дьокуускайга дьыалабыай сырыытын кэмигэр Владимир Путин «Үлэ кыбаарталыгар» сырытта уонна видеосибээһинэн ДНӨ Кировскай куорат ИТ-киинин үлэһиттэрин, ону кытта Өлөөн улууһун бэрэстэбиитэллэрин кытта кэпсэттэ.

Өлөөн нэһилиэгиттэн судаарыстыба баһылыгын кытта сибээскэ Өлөөн эбэҥки национальнай улууһун баһылыгын бастакы солбуйааччы Альгис Сергеев уонна ИТ-киин үөрэнээччитэ Стас Волошинов таҕыстылар. Кинилэр Бэрэсидьиэн «Арктика синергията» бырайыагы өйөөбүтүн иһин махтаннылар.

«Улууска 4361 киһи олорор. Үс сыл анараа өттүгэр биһиги оройуоммут оптическай лииньийэҕэ холбоммута — полярнай эргимтэҕэ бастакы түргэн тэтимнээх интэриниэт баар буолбута. Өлөөн сэлиэнньэтигэр бастакы ИТ-киин аһыллыбыта уонна икки сыл иһигэр манна 2 тыһыынчаттан тахса киһи үрдүк куурустарга үөрэннэ. Уопсайынан, биһиэхэ табыгастаах сыыппара эйгэтин тэрийэргэ бары кыахтар баар буоллулар. Биһиги дойду уонна өрөспүүбүлүкэ салалтатын өттүттэн ураты болҕомтону уонна өйөбүлү бэлиэтиибит. Эһиэхэ Арктика олохтоохторугар өйөбүлгүт иһин улахан махтал! Саҥа бырайыактары олоххо киллэрии, ол иһигэр ИТ-киини ааҕан туран, Арктикаҕа олохсуйарга бу улахан көдьүүстээх хамсааһын буолуо дии саныыбыт!»,— диэтэ Альгис Сергеев.

10 кылаас үөрэнээччитэ Стас Волошинов бөһүөлэккэ ИТ-киинигэр веб- разработкалыыр, компьютернай графикаҕа үөрэтэллэрин, сыппараҕа уруһуй эйгэтэ сайдарын туһунан кэпсээтэ. Ону кытта компьютеры баһылыырга үөрэммит аҕа көлүөнэ бэрэстэбиитэллэрэ аҕыйаҕа суохтарын эттэ. «Киин тэриллиэҕиттэн тус бэйэм идиэйэбин уонна айар эйгэҕэ баҕа санааларбын олоххо киллэрэргэ кыахтанным. Биһиги хамаандабытын кытта «Мин идэм- ИТ» куонкуруска, Hack-the-Ice разработчиктар марафонугар кыттыбыппыт», — диэн Стас Волошинов кэпсээтэ.

ДНӨ Кировскай куораттан ИТ-киин дириэктэрэ Ольга Цюпка уонна уһуйааччы Георгий Скляр сибээскэ таҕыстылар. Ольга Цюпка Ил Дархан Айсен Николаев Кировскай куоракка элбэхтик сылдьарын, нэһилиэнньэ кыһалҕатыгар улахан болҕомтотун уурарын бэлиэтээтэ. Ол курдук, кини көҕүлээһининэн куорат 2 №-дээх оскуолатын киллэрэн туран, элбэх социальнай эбийиэктэр чөлүгэр түһэрилиннилэр. Ону кытта эмиэ ИТ-киин тэриллибитэ.

«Киин иһинэн үрдүк технологиялар эйгэтигэр билиини ыларга көмөлөһөр бары наадалаах оборудование туруорулунна. Манна оскуола оҕолоро бары хайысхаларынан үөрэх куурустарын ааһыахтарын сөп. Кинилэр информационнай технологияларга олус улахан интэриэстээхтэрин бэлиэтиибин. Биһиги үөрэнээччилэрбит Саха сирин уолаттарын кытта көрсөн, холбоһуктаах күрэхтэһиилэри кыттыахтарын баҕараллар. Эрэгийиэннэринэн саҥа территориялары сыһыарыыга дойду Бырабыыталыстыбатын уурааҕа үчүгэй түмүктэри көрдөрөр. Биһиги куораппыт сайдыытыгар бэйэлэрин күүстэрин, кыахтарын уурбуттарын иһин барҕа махтал!» ,- диэтэ Ольга Цюпка.

«Биһиги бөлөхпүтүгэр ИТ-кииҥҥэ тохсус кылаас оҕолоро үөрэнэллэр. Биһиги 3D-моделированиенан дьарыктанабыт. Биһиги манна ылбыт билиибит-көрүүбүт миэхэ уонна оҕолорго туһалаах буолуоҕа диэн эрэнбин. Бу олус кэскиллээх хайысха буолан, атын оҕолорго эмиэ наадалаах. Онон инники идэни ИТ-ны кытта ситимнээн араас эйгэҕэ, холобур, мэдиссиинэҕэ, тутууга, бырамыысыланнаска туһалааҕы оҥоруохха сөп», — диэн Георгий Скляр бэлиэтээтэ.

РФ Бэрэсидьиэнэ Владимир Путин «айтишниктарга» бу үлэҕэ ситиһиилэри баҕарда. Кини үрдүк технологиялары сайыннарыы — бу биир саамай интэриэһинэй хайысханан буоларын бэлиэтээтэ. Дойду баһылыга Арассыыйа саҥа эрэгийиэннэрин киллэрэн туран, дойду үрдүнэн олус үчүгэй түмүктэри аҕалыаҕа диэн эрэнэрин биллэрдэ.