Бүгүн, ыам ыйын 7 күнүгэр, дойду биир сүрүн событиета – Кириэмил Улахан дыбарыаһыгар Владимир Путин Арассыыйа Бэрэсидьиэнин солотугар киириитин үөрүүлээх сиэрэ-туома буолла.
Бэлиэ тэрээһин Кириэмил улахан дыбарыаһын Андреевскай саалатыгар Арассыыйа судаарыстыбаннай былааҕын, Арассыыйа Конституциятын уонна Арассыыйа Бэрэсидьиэнин бэлиэтин киллэрииттэн саҕаланна.
Ол кэнниттэн РФ Федеральнай Мунньаҕын Сэбиэтин Федерациятын бэрэссэдээтэлэ Валентина Матвиенко, РФ Судаарыстыбаннай Дууматын бэрэссэдээтэлэ Вячеслав Володин уонна РФ Конституционнай Суутун бэрэссэдээтэлэ Валерий Зорькин киирэннэр сүрүн сыанаҕа турдулар.
Владимир Путин Бэрэсидьиэн солотугар киирэр бэһис инаугурациятыгар Кириэмилтэн Aurus Senat лимузинынан барда. Бэлиэтээн эттэххэ бу маарка аан бастаан бүгүн саҥа туһанылынна.
Дойду бэлиэ тэрээһинин ыалдьыттарынан Бырабыыталыстыба, Федеральнай Мунньах, Госдуума чилиэннэрэ, ону тэҥэ Бэрэсидьиэн дьаһалтатын салайааччылара, Аҕа дойду, Арассыыйа Дьоруойдара, Конституционнай суут судьуйалара, Киин быыбардыыр хамыыһыйа, дипломатическай куорпус, уопсастыбаннас бэрэстэбиитэллэрэ, култуура диэйэтэллэрэ, учуонайдар, спортсменнар уо.д.а.
Владимир Путин 2500 киһи мустубут Кириэмил Улахан дыбарыаһыгар киирдэ.
Арассыыйа Федерациятын Конституциятын 82-с ыстатыйатыгар сөп түбэһиннэрэн Федерация Сэбиэтин чилиэннэрин, Судаарыстыбаннай Дуума дьокутааттарын уонна Арассыыйа Федерациятын Конституционнай суутун судьуйаларын, норуот иннигэр Владимир Путин андаҕар тылын эттэ. Конституционнай суут бэрэссэдээтэлэ Валерий Зорькин Арассыыйа Федерациятын Бэрэсидьиэнин солотугар киирбитин туһунан иһитиннэрдэ. Салгыы Конституционнай суут бэрэссэдээтэлэ судаарыстыба баһылыгар былаас ураты бэлиэлэрин туттарда. Сонно тута саалаҕа Арассыыйа өрөгөйүн ырыата ньиргийдэ, ол кэнниттэн Кириэмил үрдүнэн былааҕы көтөхтүлэр.
Солотугар киирбит Бэрэсидьиэн бар дьонугар итэҕэллэрин иһин махтанарын, конституциянан көрүллүбүт быраабынан Арассыыйа дьонун-сэргэтин көмүскүү, араҥаччылыы сылдьарга эттэ. Аҕа дойдуларын байыаннай дьайыыга көмүскүү сылдьар байыаннай сулууспалаахтарга махтанарын эттэ. Бүгүҥҥүттэн, бу чаастан ыла кини дьон итэҕэлин толорорго туох баар кыаҕын-күүһүн ууран үлэлииргэ эрэннэрдэ.
Бэрэсидьиэн андаҕар тылын кэнниттэн солотугар официальнайдык киирдэ. Ону чиэстээн Собуор болуоссатыгар артиллерийскай салют ньиргийдэ.
Салгыы Собуор болуоссатыгар Арассыыйа Федерациятын Сэбилэниилээх күүстэрин Үрдүкү Главнокомандующайа Владимир Путин солотугар киирбитинэн Бэрэсидьиэн полката параады көрдөрдө. Москва уонна Бүтүн Арассыыйа Патриарха Кирилл Благовещенскай собуорга мэлиибэн аахта.
Арассыыйа Бэрэсидьиэнэ Владимир Путин солотугар киирэр бэлиэ тэрээһинэ түмүктэннэ.
Санатар буоллахха, Бэрэсидьиэн быыбара быйыл кулун тутар ыйга буолбута, онно дойдубут саҥа историятыгар хаһан да буолбатах ураты көстүү – элбэх киһи кыттыбыта. Быыбардааччылар 87 тахса бырыһыаннара Владимир Путины өйөөбүттэрэ. Бу дьон-сэргэ маннык уустук кэмҥэ киниэхэ итэҕэйэллэрин, киниэхэ эрэнэллэрин көрдөрөр.
Улууска өрөмүөн үлэлэрэ номнуо саҕаланнылар. Улууска ууттан эмсэҕэлээбит суоллар сорох учаастактарыгар үлэ саҕаланна. "Дьокуускайтан эбии…
Суһал ыстаап киэһээҥҥи брифинигэр бүгүн, ыам ыйын 19 күнүгэр, СӨ Бырабыыталыстыбатын бэрэссэдээтэлин бастакы солбуйааччы Дмитрий…
Саха сиригэр пионерскай тэрилтэ төрүттэммит күнүнэн 1924 сыл олунньу 17 күнэ ааҕыллар. Бу күн Дьокуускайга…
Нерюнгри куоракка ыытыллыбыт Арассыыйа үөрэнээччилэрин XII Спартакиадаларын II түһүмэҕэр уус-уран гимнастикаҕа Саха сирин спортсменкалара 3 …
Таатта улууһугар Таптал, Эрэл, Итэҕэл сылынан уонна Саха Өрөспүүбүлүкэтигэр "Ньургуһун" күнүнэн тыл үөрэхтээҕэ, биллиилээх литературнай…
Халаан уутуттан эмсэҕэлиир нэһилиэктэр ахсааннарыгар урут хаһан да киирбэтэх Хатырык нэһилиэгэ улахан ууга баран, олохтоохтор…