Владимир Путин «Арассыыйа» быыстапка-пуорумҥа сырытта

Владимир Путин Москваҕа ВДНХ павильоннарыгар сэтинньи 4 күнүттэн ыытылла турар «Арассыыйа» быыстапка-пуорумҥа аан бастаан сырытта.

Бэрэсидьиэн «Движения первых» экспозиция турар 1-кы №-дээх павильоҥҥа уонна «Россия — страна возможностей» платформаҕа, «Сделано НАМИ» павильоҥҥа тиийэн, көрдө-иһиттэ, дьону кытта кэпсэттэ. «Патриотизм» саалаҕа интерактивнай голографическай экспонаттары интэриэһиргээн көрдө диэн ТАСС суруйар.

Ону тэҥэ, кини «Атом» павильоҥҥа ядернай физика уонна атом эниэргийэтин туһаныы туһунан иһиттэ.

Бу кэнниттэн «Волонтер года» бириэмийэни туттарда. «Мы вместе» гражданскай пуорумҥа 40 дойдуттан 10 тыһыынча волонтер кытынна.

«Арассыыйа» норуоттар икки ардыларынааҕы быыстапка-пуорум дойду кыаҕын, ситиһиитин көрдөрөр сыаллаах. 2024 сыл муус устар 12 күнүгэр диэри буолуохтаах.