Владимир Путин Арассыыйа Дьоруойа Андрей Григорьев хорсун быһыытын үрдүктүк сыаналаата

РФ Бэрэсидьиэнэ Владимир Путин Арассыыйа Дьоруойа Андрей Григорьев хорсун быһыытын үрдүктүк сыаналаата.

Бу туһунан Ил Дархан Айсен Николаев “Якутия, вперед!” биэриигэ иһитиннэрдэ.

Олунньу 23 күнүгэр, Аҕа дойдуну көмүскээччи күнүгэр, Андрей Григорьев дойду бэрэсидьиэнин илиититтэн Арассыыйа Дьоруойун Кыһыл көмүс сулуһун ылбыта.  Ити кэмҥэ Пётр Киприяновка өлбүтүн кэннэ Арассыыйа Дьоруойун аатын иҥэрэргэ ыйаах баттаммыта.

“Андрей Григорьев Москваттан төннөн кэлбитин кэннэ өрөспүүбүлүкэ саалатыгар чиэстиирбитигэр дойду бэрэсидьиэнэ Владимир Путин наҕараадалааһын иннинэ эрийбитин эппитим. Кини Андрей уонна биһиги саллааттарбыт  тустарынан олус истиҥ тыллары этэн туран, маннык хорсун сэрииһиттэрдээх Арассыыйа хайаан да кыайыа диэн тоһоҕолоон бэлиэтээбитэ. Сотору уолаттарбыт дойдуларыгар кыайыылаах эргиллиэхтэрэ”, — диэн эттэ Айсен Николаев анал биэриигэ.

Санатан суруйдахха, олунньу 27 күнүгэр Дьокуускайга Ньурба улууһуттан төрүттээх Арассыыйа Дьоруойа Андрей Григорьев чиэстэммитэ. Үөрүүлээх тэрээһиҥҥэ өрөспүүбүлүкэ баһылыга Айсен Николаев киниэхэ 1,5 мөлүйүөн солкуобайдаах сэртипикээти туттарбыта.