Владимир Путин Арассыыйа Дьоруойа Андрей Григорьев туһунан киинэни өйүүрүн биллэрдэ

Владимир Путин Саха сириттэн төрүттээх Арассыыйа Дьоруойа Андрей Григорьев туһунан киинэни устууну өйүүрүн биллэрдэ.

Саха сириттэн төрүттээх Арассыыйа Дьоруойа «Тута» диэн позывнойдаах Андрей Григорьев туһунан киинэни уонна прокатын өйүүрүн Арассыыйа Бэрэсидьиэнэ Владимир Путин Саха сириттэн тиийбит тележурналист Олег Колесов-Талбан ыйытыытыгар хоруйдаан бэйэтин пресс-конференциятыгар эттэ.
Саха сирин суруналыыһын дойду баһылыгар ыйытыыта Арассыыйа норуоттарын биир сомоҕо буолуутугар, кинематографияны өйөөһүҥҥэ уонна байыаннай дьайыыга кыттар байыастар хорсун быһыыларыгар сыһыаннаан эттэ. Олег Колесов-Талбан Арассыыйа Дьоруойа Андрей Григорьев туһунан киинэни устуу былааннанарын туһунан кэпсээтэ.
«Саха норуота олус талааннаах, ол иһин Саха сиригэр музыка оскуолата баар буолбута мээнэҕэ буолбатах. Саха сирэ уопсайынан олус үчүгэйдик сайдар, ону тэҥэ инники кирбиигэ аан дойдуга букатын суоҕун тэҥэ хорсун-хоодуот байыастары биэрэр. Этиллибит киинэни, биллэн турар, өйүөхпүт уонна прокакка тахсарыгар барытын оҥоруохпут», – диэтэ Арассыыйа Бэрэсидьиэнэ.
Санатан эттэххэ, 2025 сыл тохсунньу ый саҕаланыыта социальнай ситимнэргэ Украина байыаһын видеокамератын устуута тарҕаммыта. Бу «Тута» позывнойдаах штурмовик Андрей Григорьевтыын илиинэн киирсии каадырдара этилэр. Быһаҕынан кырыктаах киирсиигэ Саха сириттэн төрүттээх байыас кыайыылаах тахсыбыта. Видеоҕа Украина байыаһа олоҕун бүтэһик мүнүүтэлэрэ көстөллөр, кини Арассыыйа саллаатыттан «чуумпутук барарыгар» көрдөспүтэ. Саха киһитэ кини көрдөһүүтүн толорбута. Бу түбэлтэ ДНӨ Трудовое сэлиэнньэтин таһыгар буолбута. Кыргыһыы кэннэ кини өссө хас да күн ВСУ тыылыгар үлэлээбитэ, боеприпаас ыскылаатын уонна хас даҕаны өстөөҕү суох оҥорбута.
Арассыыйа Бэрэсидьиэнэ Владимир Путин 2025 сыл тохсунньу ыйыгар Андрей Григорьевка, «Тута» штурмовикка, Арассыыйа Дьоруойун аатын иҥэрбитэ. 2025 сыл олунньу 23 күнүгэр Кремльгэ дойду баһылыга киниэхэ «Кыһыл Сулус» мэтээли туттарбыта.
Бүгүҥҥү күҥҥэ Арассыыйа Дьоруойа Андрей Григорьев «Саха сирэ – Дьоруойдар дойдулара» диэн эрэгийиэннээҕи каадыр бырагырааматынан үөрэнэр. «Тута» хорсун быһыытын туһунан саха кинематографистара уус-уран киинэни устарга быһаарыммыттара. Ону XXVIII Петербурга норуоттар икки ардыларынааҕы экономическай пуорумҥа эппиттэрэ. Саха сирин баһылыга Айсен Николаев бырайыагы ДНӨ баһылыга Денис Пушилинныын ырыппыттара. Билигин сценарийы бэлэмнээһин уонна бигэргэтии барар, ол кэнниттэн киинэни устуу саҕаланыаҕа.