Владимир Путин Арассыыйа дьоруойдарын кэриэстээн биир мүнүүтэлээх тохтобулу биллэрдэ

Дойду Бэрэсидьиэнэ Владимир Путин Федеральнай Мунньахха туһаайыытыгар кыргыһыы хонуутугар охтубут байыаннай дьайыы дьоруойдарын кэриэстээн биир мүнүүтэлээх тохтобулу биллэрдэ.

Владимир Путин Аҕа дойдуларын иннигэр тыыннарын биэрбит дьоруойдарбытын дойду мэлдьи өйдүү-саныы сылдьыаҕа диэн эттэ.

«Суверенитеты бөҕөргөтүү уонна көмүскээһин бүгүн бары хайысханан барар. Биллэн турар, фроҥҥа, биһиги байыастарбыт бэйэлэрин харыстаммакка сэриилэһэ сылдьаллар. Байыаннай тургутууну ааһа, Аҕа дойду интэриэһин көмүскүү, күннэтэ өлөр-тиллэр икки ардыгар сылдьар дьоҥҥо махтанабын. Кинилэр хорсун быһыыларыгар норуот бүттүүнэ сүгүрүйэр, өлбүттээхтэргэ кутурҕанын биллэрэр. Арассыыйа бэйэтин дьоруойдарын мэлдьи саныы, кэриэстии сылдьыаҕа», — диэтэ Владимир Путин.