Владимир Путин: “Арассыыйа тыа хаһаайыстыбатын бородууксуйатынан хааччыллан олорор”

РФ бэрэсидьиэнэ Владимир Путин бырабыыталыстыба чилиэннэрин кытары тыа хаһаайыстыбатын боппуруостарыгар мунньах ыытта.

Кини ааспыт сыл түмүгүнэн тыа хаһаайыстыбатын бородууксуйатын оҥорон таһаарыы көрдөрүүтэ 110,2 бырыһыаҥҥа тэҥнэспитин бэлиэтээн эттэ. Былырыын 158 мөлүйүөн туонна туораахтаах бурдук хомуллубут. Ити хаһааҥҥытааҕар да элбэх.

— Билигин биһиги тыа хаһаайыстыбатын бородууксуйатынан хааччыллан олоробут. Туораахтаах бурдугунан хааччыллыы – 185,4 %, этинэн – 101,6 %, балыгынан – 153 %, мас арыытынан – 211 %, саахарынан – 103,2 %, оҕуруот аһынан – 89,2 %, хортуоппуйунан – 93,4 %, үүтүнэн – 85,7 %. Онон этиэх тустаахпын, төһө да тас дойдулары кытары атыы-тутуу уустугун иһин, Арассыыйа экспортка таһаарар бородууксуйатын 41,6 млрд дуолларга тиийэ таһаарда. 2021 сыллаахха бу көрдөрүү 37,1 млрд дуоллар этэ. 2022-2023 сыллар түмүктэринэн, туораахтаах бурдугу тас дойдуларга таһаарыы 55–60 мөлүйүөн туоннаҕа тиийиэ диэн былаанныыбыт. Билигин да биһиги дойдубут аан дойдуга тыа хаһаайыстыбатын бородууксуйатын атыыга таһаарыыга бастакы күөҥҥэ сылдьар, — диэн иһитиннэрэр Владимир Владимирович.