Владимир Путин байыаннай дьайыы кыттыылаахтарыгар гектары биэрэргэ этии киллэрдэ

Байыаннай дьайыы кыттыылаахтарыгар уонна кинилэр аймахтарыгар “Уһук Илиҥҥи гектар” бырагырааманы Москваттан уонна Санкт-Петербургтан ураты Арассыыйа үрдүнэн баар учаастактарга тарҕатыахтарын баҕараллар.

Арассыыйа бэрэсидьиэнэ Владимир Путин бырабыыталыстыба бэрэссэдээтэлин солбуйааччы Юрий Трутнев этиитинэн бу көҕүлээһини оҥорорго дьаһайбытын туһунан источниктарга олоҕуран РБК иһитиннэрэр.

Владимир Путин “Экономическай сайдыы министиэристибэтигэр хамсааһыны оҥорорго быһаччы сорудаҕы биэрдэ.” Экономическай сайдыы министиэристибэтин пресс-сулууспата бу иһитиннэриини бигэргэттэ, биэдэмистибэ бэйэтин этиилэрин олохтоммут болдьох иһигэр киллэриэҕэ диэн эттэ. Юрий Трутнев секретариатыгар дьаһал “толорулла сылдьарын” туһунан эттилэр.

Юрий Трутнев учаастактарга наадыйыы улаатан иһэрин бэлиэтээтэ. Кини байыаннай дьайыы кыттыылаахтарыгар уонна дьиэ кэргэттэригэр сири түргэнник босхо ыларга уруккуттан үлэлии турар мэхэньиисими туһаналларыгар этии киллэрдэ.