Владимир Путин байыаннай сулууспалаахтарга анаммыт уларыйыы туһунан Ыйааҕы бигэргэттэ

Арассыыйа Бэрэсидьиэнэ Владимир Путин байыаннай таҥас кэтиитигэр уларыйыы киллэрэр туһунан Ыйаахха илии баттаата.

Докумуон быраап иһитиннэриитин официальнай портаалыгар таҕыста. Чуолаан, үрдүкү офицердарга аны олохтоммут өҥнөөх  уонна лампаастаах ыстаан көрүлүннэ. Арассыыйа Сэбилэниилээх күүстэрин таҥаһын кэмпилиэгэр камуфляж өҥнөөх ырбаахы эбилиннэ. Маннык ырбаахы үөрэх тэрилтэлэригэр сулууспалыыр курсааннар уонна саллааттар, ону таһынан дьахтар байыаннай сулууспалаахтар кэмпилиэктэригэр эмиэ киириэҕэ.

Ыйаах илии баттаммыт күнүттэн күүһүгэр киирэр. Бу күн Владимир Путин «Арассыыйа норуоттарын тылларын күнэ» диэн саҥа судаарыстыбаннай бырааһынньыгы олохтуур туһунан ыйаах бырайыагын бэлэмнииргэ сорудахтаата. Сорудах быһыытынан, дьаһалта уонна бырабыыталыстыба ыйаах бырайыагын бииргэ оҥорон судаарыстыба баһылыгар көрүүгэ киллэриэхтэрэ.