Владимир Путин байыаннайдар ахсааннарын элбэтэргэ ыйаах таһаарда

Саҥа ыйааҕынан Арассыыйа Сэбилэниилээх күүстэрин үлэһиттэрин ахсаана 2 мөлүйүөн 389 тыһыынча 130 киһи буолуоҕа. Ол иһигэр байыаннайдар ахсааннара балтараа мөлүйүөҥҥэ тиийиэҕэ.

Владимир Путин балаҕан ыйын 16 күнүгэр Арассыыйа Сэбилэниилээх күүстэрин үлэһиттэрин ахсаанын эбэр туһунан ыйаахха илии баттаата. Докумуон бэрэсидьиэн интернет-порталыгар таҕыста. Бу ыйааҕынан, былырыыҥҥытааҕар байыаннайдар ахсааннара 180 тыһыынча киһинэн эбиллиэҕэ. Санатан эттэххэ, былырыыҥҥы ыйааҕынан, Сэбилэниилээх күүстэр үлэһиттэрин уопсай ахсаана 2 мөлүйүөн 209 тыһыынча 130 киһиэхэ тэҥнэспитэ. Мантан 1,3 мөлүйүөнэ байыаннайдар этэ.

Саҥа ыйаах быйылгыттан ахсынньы 1 күнүттэн күүһүгэр киириэҕэ.