Владимир Путин “Барыта Кыайыы туһугар!” бириэмийэ лауреаттарын наҕараадалаата

Дойду Бэрэсидьиэнэ Владимир Путин Арассыыйа олохтоохторугар “Все для Победы!” бириэмийэни байыаннай дьайыы кыттыылаахтарыгар, кинилэр дьиэ кэргэттэригэр, саҥа уонна кыраныысса таһынааҕы эрэгийиэннэр олохтоохторугар көмөлөрүн иһин туттарда, диэн РИА Новости иһитиннэрэр.

Бэҕэһээ Арассыыйа Бэрэсидьиэнэ “Россия” Национальнай кииҥҥэ Норуодунай фронт тэрийбит “Все для Победы!” пуорумугар  кытынна. Судаарыстыба баһылыга Малий дьиэ кэргэн өҥөлөрүн бэлиэтээтэ. Кэргэннии Игорь уонна Валентина, кинилэр уоллара Илья Курахово куорат олохтоохторун туһугар кыһамньыларын уурбуттар. Көннөрү мопедка олорон уот- буулдьа ортотунан дьиэ кэргэн баһылыга куорат эмсэҕэлээбит олохтоохторугар эми-тому уонна биинтэлэри тиэрдибит. 150 киһи бу көмөнү туппут.  Илья дроннар атаакаларын кэмигэр дьону быыһаабыт. Ону тэҥэ кини ыалларга дьиэлэринэн кэрийэн ууну таспыт.

Маны сэргэ бэрэсидьиэн бириэмийэни байыастарга таҥас тигэр Ольга Язеваҕа туттарда. Язева – аҕабыыт кэргэнэ, кини уолаттара байыаннай дьайыыга кытталлар. Тигэр таҥаһын  дьахтар храмҥа прихожаннар сиэртибэлээбит харчыларынан атыылаһар, киниэхэ 100 волонтер дьахтар көмөлөһөр.

Путин “Волна” радиоэлектроннай комплексын оҥорбут Иван Солдатовы бэлиэтээтэ.

Солдатов БАРС-30 баҕа өттүнэн этэрээт РЭБ бөлөҕүн хамандыырын быһыытынан инники күөҥҥэ сылдьыбыта. Кини айбыт “Волна” комплекса Крымы көмүскүүр.