Владимир Путин: “Бэлэм дьиэлэргэ чэпчэтиини көрүөххэ”

Саҥа дьиэлэргэ көрүллэр чэпчэтиилээх ипотеканы таһынан иккис ырыынакка эмиэ чэпчэтиилэр киириэхтэрин сөп. Бу туһунан бэҕэһээ РФ бэрэсидьиэнэ Владимир Путин “ДОМ.РФ” АУо салайааччытын Виталий Муткону кытары кэпсэтиитигэр иһитиннэрдэ.

“ДОМ.РФ” – судаарыстыбаттан бэриллэр чэпчэтиилээх ипотекалары салайар акционернай уопсастыба буолар. “Уһук Илиҥҥи ипотека”, “Дьиэ кэргэн ипотеката”, “Чэпчэтиилээх ипотека”, ону таһынан тутааччы тэрилтэлэргэ көмө барыта бу хампаанньа нөҥүө ааһар.

Виталий Мутко иһитиннэрбитинэн, судаарыстыбаттан субсидиялаах ипотеканан билиҥҥитэ икки мөлүйүөн кэриҥэ киһи туһаммыт. — Былырыын бэриллибит ипотекалар 46 бырыһыаннарын судаарыстыбаттан чэпчэтиллибит ипотека ылар, — диэн этэр Виталий Леонтьевич.

Кэпсэтии кэмигэр Владимир Путин урут тутуллубут дьиэлэри атыылаһыыга чэпчэтиилэри көрүөххэ сөбүн туһунан иһитиннэрдэ.

— Биһиги тутууну көҕүлүүрбүтүн таһынан, дьиэ кэргэн олорор усулуобуйатын тупсарарыгар ураты болҕомтобутун уурабыт. Иккис ырыынакка, ол эбэтэр урут тутуллубут бэлэм дьиэлэри ылыыга, чэпчэтии көрүллэр усулуобуйатын киллэрдэххэ дьон туһаныа этэ дуо? Мин санаабар, иккис ырыынакка дьон наадыйар. Ону таһынан бу тутуу эйгэтигэр туһаны эрэ аҕалыа этэ, — диэн этэр Владимир Владимирович.

Виталий Мутко мунньахха иһитиннэрбитинэн, билигин иккис ырыынакка дьиэлэр саҥа тутуулардааҕар быдан чэпчэкилэр уонна дьон-сэргэ тутуллубут дьиэлэри ыла сатыыр.

— Билигин иккис ырыынакка дьиэ сыаната быдан чэпчэки. Ол иһин дьон бэлэм дьиэлэри көрө сатыыллар, — диэн этэр кини.