Владимир Путин Дьиэ кэргэн сылын аста

РФ Бэрэсидьиэнэ Владимир Путин тохсунньу 23 күнүгэр “Таптыыр күндү дьоммут” диэн дьиэ кэргэҥҥэ туһуламмыт бүтүн Арассыыйатааҕы пуорум кэмигэр Дьиэ кэргэн сылын аста.

Владимир Путин киирии тылыгар оҕону иитии ыал сүрүн сыала-соруга буоларын этэн туран, норуот тыла-өһө, култуурата, үгэһэ барыта дьиэ кэргэнтэн саҕыллан тахсарын бэлиэтээтэ.

— Дьиэ кэргэн сүрүн сыала-соруга диэн оҕолонуу, удьуору тэнитии буолар. Ол аата биһиги норуоппутун элбэтиибит, историябыт, култуурабыт барыта дьиэ кэргэнтэн саҕыллан тахсар. Көлүөнэттэн көлүөнэҕэ бэриллэр үгэспит, үөрэхпит-билиибит, идэбит барыта дьиэ кэргэни кытары сибээстээх. Ол иһин былаас бары хайысхатыгар дьиэ кэргэн интэриэһэ, туруктаах буолуута бастакы уочарат көрүллүөхтээх. Судаарыстыба ыытар бэлиитикэтигэр дьиэ кэргэн боппуруоһа инники күөҥҥэ сылдьыахтаах, — диэн этэр кини.

Бэрэсидьиэн кэлиҥҥи сылларга элбэх оҕолоох дьиэ кэргэн ахсаана эбиллэ турарын бэлиэтээтэ.

— Кэлиҥҥи сылларга элбэх оҕолоох ыал ахсаана 26 бырыһыан эбиллибит. Оттон элбэх оҕолоох дьиэ кэргэн оҕолорун ахсаана 30 бырыһыанынан үрдээбит. Бу үчүгэй көрдөрүү, — диэн иһитиннэрэр.

Санатан эттэххэ, билигин элбэх оҕолоох дьиэ кэргэн статуһун үстэн элбэх оҕолоох ыал ылар. Владимир Путин кинилэргэ анаан туспа чэпчэтиилэри киллэрэн турар. Ол иһигэр оҕолорго 18 эбэтэр 23 саастарыгар диэри төлөнөр биир кэлим социальнай көмөнү, сир-уот ылыытыгар чэпчэтиилэри, субсидиялаах билиэттэри, о.д.а. көмөлөрү.

Бэрэсидьиэн билигин дьиэ кэргэн төрдүн-ууһун үөрэтиитэ бастакы күөҥҥэ тахсыбыта олус үчүгэйин бэлиэтиир. “Билигин дьон-сэргэ төдүн-ууһун, норуотун историятын, биллиилээх, киэн туттар дьонун билиэн-көрүөн баҕарара ордук күүһүрдэ диэн көрөбүн. Хайҕабыллааҕа баар, дьиэ кэргэн историятын төрөппүттэр оҕолоругар көлүөнэттэн көлүөнэҕэ кэпсээн, тириэрдэн иһэллэр. Бу буолар биһиги үтүө үгэспит”, — диэн этэр кини.

Владимир Путин иһитиннэрбитинэн, дьиэ кэргэн институтун сайыннарыы, ийэ, аҕа оруолун үрдэтии, оҕоҕо харыстабыллаахтык сыһыаннаһыы, демография бырагыраамалара, дьиэ кэргэн үгэһин көлүөнэттэн көлүөнэҕэ тиэрдии барыта судаарыстыба сүрүн боппуруостара буолаллар.

Уонна түмүккэ Владимир Путин: “Биһигини барыбытын түмэр күүспүт дьиэ кэргэн үйэлээх үгэһэ буолар. Арассыыйа – бу биһиги бүттүүммүт улахан дьиэбит. Бу манна биһиги, омукпутуттан, тылбытыттан, итэҕэлбититтэн тутулуга суох, биир дьиэ кэргэн буолан олоробут. Төһөнөн биһиги биир сомоҕо буолабыт да, оччонон биһиги күүспүт үрдүү, улаата турар. Уон оччонон биһиги туох баар ыарахаттары туоруур, туох баар сыалбытын-сорукпутун ситиһэр кыахтанабыт”, — диэн эттэ.