Владимир Путин дьоҕус биисинэскэ нолуок уларыйыыларыгар көһүү кэмин өйөөтө

Дьоҕус биисинэскэ нолуок уларыйыыларыгар көһүү кэмин киллэрэр туһунан Экэниэмикэ сайдыытын миниистирэ Максим Решетников этии киллэрдэ. Бу туһунан Арассыыйа Бэрэсидьиэнэ Владимир Путин тохсунньу 21 күнүгэр бырабыыталыстыба мунньаҕар эттэ.

«Үчүгэй этии, Максим Геннадьевич, көһүү кэмин туһунан сөптөөх этии, уонна, биллэн турар, мин өйүүбүн», — диэн дойду баһылыгын тылларын ТАСС иһитиннэрэр.

Видеокэмпириэнсийэ сибээһинэн барбыт уонна «Сыл түмүктэрэ» биэриигэ көтөҕүллүбүт боппуруостарга анаммыт мунньахха Максим Решетников 2026 сылга дьоҕус биисинэскэ көһүү кэмин киллэрэргэ уонна хампаанньалар үлэлэрин көрдөрүүлэрин ааспыт 2025 сылынан буолбакка, 2026 сыл бастакы кыбаарталынан ааҕарга этии киллэрдэ. Кини бэлиэтээбитинэн, бу биисинэс көрдөрүүлэрин сөпкө суоттанарыгар уонна нолуокка чэпчэтиилэри туһанарыгар кыах биэриэ.