Владимир Путин: “Дойду бары өттүнэн харыстабыллаах буолуохтаах”

РФ бэрэсидьиэнэ Владимир Путин бу нэдиэлэҕэ куттал суох буолуутун федеральнай сулууспатын мунньаҕын ыытта. Мунньахха дойду экэниэмикэтигэр, информационнай хонуутугар куттал суоһаабатын хааччыйыы бастакынан көрүллүөхтээҕин бэлиэтээтэ.

Дойдубут аҕа баһылыга, бастатан туран, Арассыыйа сэбилэниилээх күүстэригэр, Росгвардияҕа улахан болҕомтону ууруохха наадатын бэлиэтээтэ.

— Сэбилэниилээх Rүүстэр, Росгвардия байыаннай эпэрээссийэ соругун толорууларыгар көмөлөһүөххэ. Ол иһигэр информацияны түргэнник тириэрдиигэ, чуҥнааһыны ыытыыга үлэ барыахтаах. Ону таһынан Арассыыйа састаабыгар киирбит Донецкай, Луганскай Народнай Өрөспүүбүлүкэлэргэ, Запорожье, Херсон уобаластарыгар тустаах федеральнай уорганы тэрийии тэтимнээхтик барыахтаах. Кыраныыссаны маныыр сулууспа Арассыыйа уонна Украина кыраныыссаларын кыраҕытык кэтиирэ наада, — диэн иһитиннэрэр кини.

Владимир Путин арҕааҥҥы дойдулар билигин өссө сытыырхайан туран Арассыыйаны утары араас үлэни ыытыахтарын этэн туран, дойдуну салайар, быраап эйгэтин, байыаннай структуралар, технологиялар, о.д.а. туһааннаах информациялар харыстабыллаах буолуохтаахтарын бэлиэтээтэ.

— Арассыыйа туох баар структуралара харыстабыллаах буолуохтаахтар. Информация ханна да тахсыбатын хааччыйыы өссө күүһүрүөн наада, — диэн эттэ кини.

Ону таһынан билигин да дойдуга террористическэй саба түһүү куттала баарын, манна туһуламмыт үлэ дьэҥкэ уонна чуолкай буолуохтааҕын иһитиннэрдэ. “Дьон-сэргэ мустар сирин, тырааныспардары, эбийиэктэри харабыллааһын харах далыттан тахсыа суохтаах. Социальнай ситимнэргэ, интернет нөҥүө терроризмы, экстремизмы күөттээһини эрдэттэн билиэххэ, ону уодьуганныахха. Манна ордук ыччат киирэн биэрэр, онон эдэр дьон ортотугар үлэни эмиэ ыытыахха”, — диэн этэр бэрэсидьиэн.

Уонна мунньах түмүгэр дойду экэниэмикэтигэр куттал суох буолуутун хааччыйыыга улахан үлэ барыахтааҕын, сүрүн болҕомто манна туһуланыахтааҕын бэлиэтээтэ.