Владимир Путин экэнэмиичэскэй пуорумҥа тыл эттэ

Кытайга ыытыллыбыт ШОС саммитын кэнниттэн РФ бэрэсидьиэнэ Владимир Путин Владивостокка  Х Илиҥҥи экэнэмиичэскэй пуорумҥа кэлэн, пленарнай сиэссийэҕэ тыл эттэ. Манна туох сүрүн  этиилэри оҥордо, бырабьыыталыстыбаҕа ханнык сорудахтары биэрдэ диэн “Российская газета” иһитиннэрэр.

РФ Киин баана инфляцияны кытта охсуһар, 4–5%-тан улахана суох көрдөрүүгэ төнүннэрэ сатыыр. “Ол гынан баран сүрүн ыстаапканы олус түргэнник намтатан кэбистэххэ, сыана үрдээбитинэн барыа”.

РФ бэрэсидьиэнэ 2027 сылтан Уһук Илин уонна Арктика сиригэр-уотугар биисинэскэ чэпчэтиилээх эрэсиими киллэрэри соруйда.

Путин 2%-наах уһук илиҥҥи ипэтиэкэни учууталларга эрэ буолбакка, үөрэхтээһин бары үлэһиттэригэр, ону тэҥэ сааһыттан тутулуга суох элбэх оҕолоох ыалларга барыларыгар киллэрэргэ сорудахтаата.

Путин Уһук Илиҥҥи федеральнай  уокурук уһун болдьохтоох стратегическай сайдыытын 2036 сылга диэри бигэргэтэллэрин сорудахтаата.

Арассыыйаҕа 2014-2024 сылларга дьадайыы таһыма 11,3%-тан 7,2%-ҥа диэри намтаабыт.

Европа хампаанньалара Арассыыйаттан төһө да ороскуоттааҕын билэ-билэ бэлитиичэскэй көрүүлэринэн тахсан барбыттара, билигин хаһан төннөллөрүн күүтэллэр.

Арассыыйа тас да бэлиитикэтэ, экэнэмиичэскэй да бэлиитикэтэ туруктаах уонна хайдаҕа биллэр.

Арассыыйа аһаҕас, кимтэн да күрүөлэммэт уонна “сымыыт иһигэр” кирийэн сыппат.

Икки бастаах тойон кыыл арҕаа, илин диэки эрэ буолбакка, соҕуруу диэки эмиэ көрөр.

Арассыыйаттан КНДР-га тахсар муоста эһиил хайаан да аһыллыахтаах.

Сөмөлүөтүнэн быһа сылдьыһыы сайыннаҕына, КНДР-ы кытта чугасаһыы өссө улаатан иһиэ.