Владимир Путин өрө туруу туһунан Арассыыйа олохтоохторугар иһитиннэрии оҥордо

РФ бэрэсидьиэнэ Владимир Путин бэҕэһээ Москва бириэмэтинэн киэһэ уон чааска Арассыыйа олохтоохторугар иһитиннэрии оҥордо. Бэрэсидьиэн дойдубутугар араас кутталы үөскэтэ, ис иирсээни таһаара сатааһын эрдэттэн таҥнастыыга тэҥнээҕин бэлиэтээтэ.

“Бүгүн эмиэ Арассыыйа олохтоохторугар хас биирдиигитигэр иһитиннэриинэн тахсан эрэбин. Бастатан туран, бар дьоммор дириҥ махталбын тиэрдиэхпин баҕарабын. Биһиги уопсастыбабыт чиҥ буоларын өссө төгүл көрдөрдүбүт”, — диэн саҕалыыр иһитиннэриитин бэрэсидьиэн.

Владимир Путин этэринэн, Арассыыйаҕа ис иирсээни таһаара сатааһын түмүгэ биир – бу кыаллыбат дьыала.

— Дойдубутугар араас кутталы үөскэтии, ис иирсээни таһаара сатааһын, сэбилэниилээх өрө турууну тэрийии хара маҥнайгыттан таҥнастыыга тэҥнээх этэ. Хайа да түгэҥҥэ саба баттанара биллэрэ. Ону тэрийээччилэр өйдөөмүөх туһалара суох. Ону ааһан улахан буруйу оҥорон эрэллэрин, дойдубутун, билигин тастан ыгыы-түүрүү күүһүрбүт кэмигэр, араастаан хайыта сатаабыттарын эмиэ өйдүүллэр. Бу кэмҥэ уопсастыба, толорор уонна сокуону оҥорор былаас, хайа да таһымҥа, уопсастыбаннай тэриллиилэр, итэҕэл түмсүүлэрэ, баартыйалар Конституцияны көмүскээһиҥҥэ биир сомоҕо буоллулар, биир санаанан салайтардылар”, — диэн этэр кини.

Бэрэсидьиэн Арассыыйаҕа утары турааччылар фроҥҥа кыайтарбыттарын ситиһэ сатыылларын эттэ.

— Бу хамсааһынынан кинилэр фроҥҥа кыайтарбыттарын иэстэһэ сатаатылар. Ол эрээри манна эмиэ кыайтардылар. Өрө турууга байыаннайдар, быраабы көмүскүүр уорганнар, анал сулууспа үлэһиттэрэ бары дойдубутун көмүскээһиҥҥэ биир кэккэҕэ турдулар. Кинилэргэ махтанан туран итини этэбин, — диэн иһитиннэрдэ.

Владимир Владимирович “Вагнер” бөлөҕүн туһунан этэригэр, бу бөлөх байыастара, салайааччылара эмиэ Арассыыйа патриота буолалларын, дойдуларын туһугар киирсэллэрин бэлиэтээн эттэ.

— Ол эрээри биһиги билэбит уонна билиэх тустаахпыт, “Вагнер” бөлөх байыастара, салайааччылара үгүстэрэ эмиэ Арассыыйа патриоттара буолалларын. Кинилэр Донбааһы, Новороссияны ылыыга эр санааларын көрдөрбүттэрэ. Кинилэри бэйэлэрин табаарыстарыгар, сэриигэ бииргэ сылдьыбыт байыастарыгар утары туруора сатаатылар. Ол иһин бу түгэн тахсыаҕыттан биһиги хаан тохтуутун таһаарбат туһугар үлэлэстибит. Ол иһигэр кинилэр сыыһаларын өйдүүллэригэр бириэмэ биэрэр туһугар, — диэн этэр кини.

Итини этэн туран Владимир Путин “Вагнер” байыастара Арассыыйа аармыйатыгар салгыы сулууспалыыр эбэтэр дойдуларыгар, дьонноругар-сэргэлэригэр төннөр кыахтаахтарын иһитиннэрдэ.

— Оборуона министиэристибэтин, туһааннаах уорганнары кытары дуогабар түһэрсэн, салгыы Арассыыйа аармыйатыгар сулууспалыы хаалыаххытын эбэтэр дойдугутугар төннүөххүтүн сөп. Белоруссияҕа барар киһи онно төннүөн сөп. Мин биэрбит тылбын тутабын. Билигин хайа суолу таларгыт бэйэҕит илиигитигэр, ол эрээри итэҕэйэбин, бу талыы Арассыыйа буойунун быыбара буолуоҕа, — диэн эттэ.

Түмүккэ Владимир Путин Белоруссия бэрэсидьиэнигэр Александр Лукашенкоҕа махталын биллэрдэ.