Салгыы
Владимир Путин: “Хорсун-хоодуот, кыраҕа-кыаммакка көмөлөһөр амарах санаалаах дьонноохпут”

Владимир Путин: “Хорсун-хоодуот, кыраҕа-кыаммакка көмөлөһөр амарах санаалаах дьонноохпут”

Ааптар:
08.12.2022, 11:30
Бөлөххө киир:

Аан дойду үрдүнэн турбут дьаҥ-дьаһах кэмигэр Арассыыйаҕа волонтердар хамсааһыннара олус күүстээҕин көрдөрбүтэ. Кимтэн да, хантан да этиттэриитэ суох дьоннор бэйэ-бэйэлэригэр ким туох кыахтааҕынан көмөлөһөн барбыттара. Билигин бу хамсааһын Арассыыйаны бүтүннүүтүн тилийэ көппүтүн таһынан өссө тас дойдуга тарҕанна. Бу күннэргэ дойдубут тэбэр сүрэҕэр Москваҕа “Биһиги бары бииргэ” диэн волонтердар норуоттар икки ардыларынааҕы пуорумнара буолан ааста.

Волонтердар хамсааһыннара

“Биһиги бары бииргэ” бүтүн Арассыыйатааҕы бырайыак 2020 сылтан үлэлиир. Бу сааскыттан кулун тутартан саҕалаан үлэтин саҥалыы тэрийэн ыытар. Бырайыак сүрүн сыалынан Украина соҕуруу-илиҥҥи өттүттэн кэлбит дьоҥҥо, ону таһынан доруобуйа харыстабылын, социальнай сулууспа үлэһиттэригэр, кырдьаҕастарга, кыамматтарга, билигин өссө мобилизацияҕа барбыт дьоҥҥо, кинилэр дьиэ кэргэттэригэр көмөлөһүү буолар. Бу хамсааһын чэрчитинэн, волонтердар бастаан утаа Донецкай, Луганскай Народнай Өрөспүүбүлүкэлэртэн кэлбит дьоҥҥо гуманитарнай көмөнү хомуйбуттара, тиксэрбиттэрэ. Манна даҕатан эттэххэ, волонтердар хамсааһыннара аан дойду үрдүнэн турбут дьаҥ-дьаһах кэмигэр дьоҥҥо-сэргэҕэ эми-тому, аһы-үөлү тиэрдиигэ, ону сэргэ балыыһа үлэһиттэригэр улахан күүс-көмө, тирэх буолбуттара. Онон бу чааһыгар волонтердар улахан уопуттаахтар.

Иккиһинэн, дойдуга мобилизация биллэриллибитин кэннэ балаҕан ыйыттан волонтердар “Норуот фронун” көҕүлээһининэн аны саллааттарга, кинилэр дьиэ кэргэттэригэр көмөлөһөргө туруммуттара. Бырайыак иһинэн эрэгийиэннэргэ анал ыстааптар, пууннар тэриллибиттэрэ, дойду үрдүнэн биир ситимнээхтик үлэлиир суһал көмө төлөпүөнэ олохтоммута. Икки ый иһигэр волонтердар мобилизацияҕа барбыт саллааттарга 840 туонна аһы-үөлү, 168 тыһыынчаттан тахса киһи күннэтэ туттар анал нобуорун хомуйан, бэлэмнээн ыыппыттара. Билигин хабар эйгэлэрэ өссө кэҥээн, эрэгийиэннэр бэйэлэрэ турунаннар, саллааттарга сылаас таҥас, сүгэһэр тигэн ыытар буоллулар.

Бу соторутааҕыта Ийэлэр күннэригэр волонтердар тэрийиилэринэн дойду үрдүнэн ийэлэри эҕэрдэлээһин, кинилэргэ көмөлөһүү киэҥ хабааннаахтык ыытыллыбыта. РФ бэрэсидьиэнэ Владимир Путин саллааттар ийэлэрин кытары көрсүһүүтүгэр дойдуга тапталы иҥэрии, хорсун-хоодуот уолаттары иитэн таһаарыы барыта дьиэ кэргэнтэн, ыал ийэтиттэн, аҕатыттан ситимнэнэн тахсарын өссө төгүл бэлиэтээн эппитэ.

— Хас биирдии ийэ сүрэҕэр оҕото, хас да сааһын туолбутун иһин, өрүү кыра оҕо. Оҕону сүтэрии бу туохха да тэҥнэммэт дириҥ аһыы. Бу аһыыны биһиги бары тэҥҥэ үллэстэбит. Ол эрээри эһиги умнумаҥ, эһиги уолаттаргыт, хас биирдиилэрэ, дьоруой буолалларын. Бу барыта дьиэ кэргэнтэн, эһигиттэн ситимнэнэн тахсарын. Билигин сулууспалыы сылдьар хас биирдии уолаттар Аҕа дойдуларын көмүскүү сылдьаллар. Кинилэр хорсун санаалара, дойдуларыгар бэриниилээх буолуулара барыта дьиэ кэргэттэриттэн, төрөппүттэрин холобурдарыттан силистэнэн-мутуктанан тахсар, — диэн эппитэ Владимир Владимирович.

Пуорум түгэннэриттэн

Бу пуорумҥа барыта 45 дойдуттан, Арассыыйа үгүс эрэгийиэниттэн уон тыһыынчаттан тахса киһи кытынна. Тэрээһин чэрчитинэн, араас тиэмэҕэ кэпсэтиилэр, ырытыһыылар, быыстапкалар, “төгүрүк остуоллар”, о.д.а. буолан аастылар. Кэрэхсэбиллээҕэ баар, үгүс тэрээһин култуура, духуобунас эйгэтигэр ыытылынна. Холобур, бэрэсидьиэн пуондата Арассыыйаҕа саҥа холбоспут Донецкай, Луганскай Народнай Өрөспүүбүлүкэлэргэ, Запорожье, Херсон уобаластарыгар анаан култууралар алтыһыыларыгар улахан тэрээһини ыытта.

Пуорум кэмигэр РФ бэрэсидьиэнэ Владимир Путин волонтердары кытары көрүстэ уонна “Сыл бастыҥ волонтера” бириэмийэни туттарда.

— Бу пуорум Арассыыйа бары эрэгийиэннэрин таһынан үгүс тас дойдуну хабар улахан тэрээһининэн буолар. Арассыыйа үрдүнэн барыта сүүрбэ биир мөлүйүөнтэн тахса киһи волонтердуур, ити уопсай нэһилиэнньэ уон биэс бырыһыанын ылар. Санаан көрүҥ, хайдахтаах курдук халыҥ аармыйаный? Билигин бу халыҥ аармыйа аны анал байыаннай эпэрээссийэҕэ сылдьар уоланнарбытыгар, кинилэр дьиэ кэргэттэригэр күүс-көмө, тирэх буолар. Волонтердар хамсааһыннарын өйүүрбүт ол иһин улахан суолталаах. Мин санаабар, бу маннык тэрээһиннэргэ бастыҥ дьоммут ааттара ааттаныахтаах, үтүө быһыылара норуокка биллиэхтээх, көстүөхтээх. Арассыыйа урут уруккуттан хорсун-хоодуот, кыраҕа-кыаммакка көмөлөһөр амарах санаалаах дьоннооҕунан биллэр. Ол биһиги уратыбыт, ол биһиги күүспүт. Манна өссө эбэн этиэм этэ, волонтер диэн тыл норуоттар икки ардыларынааҕы өйдөбүл, оттон доброволец, бэйэтин баҕатынан көмөлөһөөччү, — бу буолар биһиэхэ чугас өйдөбүл. Доброволец, аатыгар да этэринии, үтүө санааны саҕааччы, үтүө санаанан салайтарааччы. Бу пуорум саамай сүрүнэ итиннэ сытар, — диэн бэлиэтиир Владимир Владимирович.

Өскөтүн былырыын пуорум доруобуйа харыстабылыгар, чөл туруктаах буолууга, успуорка туһуламмыт буоллаҕына, быйыл дойдулар бииргэ үлэлээһиннэригэр, мобилизацияҕа хабыллыбыт саллааттарга, кинилэр дьиэ кэргэттэригэр көмөлөһүүгэ, Арассыыйа саҥа эрэгийиэннэригэр болҕомто уурулунна. Тас дойдуттан Кытай, Америка Холбоһуктаах Штаттарын, Испания, Аргентина, Африка, Тутулуга суох судаарыстыбалар нацияларын дойдуларын волонтердара кытыннылар. Ити эмиэ суолтата олус улахан.

 

+1
0
+1
0
+1
0
+1
0
+1
0
+1
0
+1
0
Бары сонуннар
Салгыы
29 марта
  • -14°C
  • Ощущается: -20°Влажность: 40% Скорость ветра: 3 м/с

Сообщить об опечатке

Текст, который будет отправлен нашим редакторам: