Владимир Путин “Кэлэр көлүөнэ оонньуутун” аста

“Кэлэр көлүөнэ оонньуута” норуоттар икки ардыларынааҕы өй уонна успуорт турнира Казань куоракка саҕаланна. Дойду аҕа баһылыга Владимир Путин олунньу 21 күнүгэр күрэхтэһиини аста. Манна спортсменнар киберспорт, роботехника, информационнай технология курдук саҥа көрүҥнэргэ күөн көрсүһүөхтэрэ.

Күрэхтэһии кулун тутар 3 күнүгэр диэри салҕанан барыаҕа. Манна барыта 100 дойдуттан икки тыһыынчаттан тахса кыттааччы кэллэ. Күрэхтэһии аһыллыытыгар дойду салайааччыларыттан Белоруссия, Казахстан, Кыргызстан, Сербия, Узбекистан уонна Таджикистан бэрэсидьиэннэрэ кыттыыны ыллылар.

Күрэхтэһээччилэр биэс хайысханан барыта 21 көрүҥҥэ күөн көрсүөхтэрэ. Ол иһигэр успуорт көрүҥнэригэр уонна билиҥҥи үйэ саҥа технологияларыгар күрэхтэһиэхтэрэ. Арассыыйа бэрэсидьиэнэ Владимир Путин бу күрэхтэһиини успуорт саҥа көрүҥүн быһыытынан сыаналыыр. Кини бэлиэтииринэн, бу кырдьык кэлэр көлүөнэ күрэхтэһиитэ.

— Бу күрэхтэһии, аатыгар да этиллэринии, кэлэр көлүөнэ оонньуута. Манна успуорт төрүт көрүҥнэрэ, саҥа технология, үөрэх, наука барыта силбэһэр. Үөрүүлээҕэ баар, успуорт төрүт көрүҥнэрин киберспорду кытары холбоон биир күрэхтэһиини тэрийии Арассыыйаттан саҕаланна. Арассыыйа спортивнай держава быһыытынан биллэр, дойдубутугар успуорт хаһан баҕарар инники күөҥҥэ тутуллара, успуорт ханнык баҕарар көрүҥэр үгүс ситиһиилээхпит. “Кэлэр көлүөнэ оонньуута” да итилэртэн итэҕэһэ суох сайдыаҕа, үүнүөҕэ дии саныыбын, — диэн этэр кини.