Владимир Путин КНР бэрэссэдээтэлин Си Цзиньпины кытары кэпсэттэ

Дойдубут аҕа баһылыга Владимир Путин тохсунньу 21 күнүгэр видео-сибээһинэн Кытай Народнай Өрөспүүбүлүкэтин бэрэссэдээтэлин Си Цзиньпины кытары кэпсэттэ.

Икки дойду лидердэрэ экэниэмикэ, тас дойдулары кытары үлэлэһии, дойдулар бииргэ үлэлээһиннэрин хаҥатыы, о.д.а. боппуруостары кэпсэттилэр. Санатан эттэххэ, 2024-2025 сыллар Арассыыйаҕа уонна Кытайга хардарыта Арассыыйа, Кытай култуураларын сылларынан биллэриллибитэ.

Владимир Путин Арассыыйа уонна Кытай бииргэ үлэлээһиннэрэ аан дойдуга үтүө холобур буоларын бэлиэтээтэ уонна ааспыт сыл бу икки дойдуларга куһаҕана суохтук ааспытын эттэ.

— Мин санаабар, ааспыт сыл биһиэхэ үтүө түмүктэрдээх буолла. Былырыын дойдуларбыт бииргэ үлэлээбиттэрэ, дипломатическэй сыһыаны олохтообуттара 75 сыллаах үбүлүөйүн бэлиэтээбиппит. Бу тэрээһин чэрчитинэн дойдуларбытыгар Култуура сылын хардарыта ыытарга дуогабардаспыппыт. Ону таһынан ааспыт сылга Шанхайдааҕы бииргэ үлэлэһии, БРИКС түмсүүлэр мунньахтарыгар бииргэ үлэлэһиибитин бэлиэтээн этиэм этэ, — диэн иһитиннэрдэ Владимир Владимирович.