Владимир Путин Кореяҕа, Вьетнамҥа сылдьыаҕа

Дойдубут аҕа баһылыга Владимир Путин бэс ыйын 18-20 күннэригэр тас дойдуларга Хотугу Кореяҕа уонна Вьетнамҥа командировкаҕа сылдьыаҕа. Бу туһунан Арассыыйа бэрэсидьиэнин пресс-сулууспата иһитиннэрэр.

 Владимир Путин КНДР Судаарыстыбаннай дьыалаларын бэрэссэдээтэлэ Ким Чен Ын уонна Вьетнам Коммунистическэй баартыйатын Киин кэмитиэтин генеральнай сэкирэтээрэ Нгуен Фу Чонг ыҥырыыларынан илиҥҥи Азия дойдуларыгар үлэлээн кэлиэҕэ.

Былырыын күһүн балаҕан ыйыгар Ким Чен Ын Владивостокка кэлэн барбыта. Онно сылдьан Владимир Путины Хотугу Кореяҕа ыҥырбыта. Арассыыйа Кореяны кытары экэниэмикэ үгүс салаатыгар уонна байыаннай дьыалаҕа бииргэ үлэлэһэр.

Оттон Вьетнамҥа сырыытыгар Владимир Путин дойду салалтатын кытары экэниэмикэ, наука, гуманитарнай боппуруостары кэпсэтиэҕэ. Ону сэргэ, бэрэсидьиэн пресс-сулууспата иһитиннэрэринэн, норуоттар икки ардыларынааҕы, аан дойдутааҕы боппуруостары эмиэ көрүөхтэрэ.

Бу командировкаларын иннинэ Владимир Путин Саха сиригэр кэлэн Ил Дархан Айсен Николаевы кытары көрсөрө былааннанар.