Владимир Путин: «Краснодарга экология иэдээнэ тохтотуллуоҕа»

Бэрэсидьиэн Владимир Путин пресс-кэмпириэнсийэтин кэмигэр Краснодарскай кыраай олохтоохторо балаһыанньаны видеонан устан ыытан, ыйытыы биэрдилэр.

Соторутааҕыта Керченскэй хомоҕо танкердар саахалланан, муораҕа уматык тохтубута. Көрдөххө, Анапа таһынан 4-5 көстөөх сиринэн кытыл барыта мазут буолбут, көтөрдөр, балыктар өлөн сыталлар. Волонтердар бэйэлэрин күүстэринэн кыайан хомуйбаттар. Сүүнэ бээтинэ Геленджик диэки баран иһэр.

— Экология өттүнэн бу улахан иэдээн буолар. Быраабы харыстыыр уорганнар суудуналар капитаннарын дьайыыларыгар сыана биэрэллэр, быһаарсаллар. Бэҕэһээ 4-5 бааллаах шторм салҕанан, үлэлиир кыаҕы биэрбэт. Сарсыҥҥыттан чуумпурар бадахтаах. Сорох танкердар тимирбиттэр, сорохтор тимирэн эрэллэр. Араас сулууспалар үлэлииллэр. Бырабыыталыстыбаҕа үлэни сүрүннүүллэригэр, түргэтэтэллэригэр сорудахтаабытым. Күн аайы миэхэ дакылааттыыллар.

Чугастааҕы кэмҥэ тугу гынарбытын быһаарыахтаахпыт. Бу кыһалҕа бириэмэнэн, түһүмэхтэргэ араарыллан, быһаарыллыахтаах. Бастакытынан, мазуту тохтотуохтаахпыт, иккиһинэн, хомуйуохтаахпыт. Тымныы ууга мазут кытаатан баран, түгэххэ түһүөн сөп. Саас сылыйдаҕына, күөрэйэн тахсыан сөп. Ону учуоттаан, үлэни ыытыахтаахпыт. Губернатор Кондратьев этэринэн, 3 тыһыынчаттан тахса киһи үлэлиир. Наада буоллаҕына, ЫБММ эбии бөлөхтөрүн ыытыахпыт. Билигин бу кыһалҕаны туоратарга  инники дьайыыларбытын быһаарыахтаахпыт, — диэн бэрэсидьиэн эттэ.