Владимир Путин Кытай премьер-миниистирин Си Цзиньпины кытары көрсүөҕэ

Дойду Аҕа баһылыга Владимир Путин алтынньы 17-18 күннэригэр Кытай Народнай Өрөспүүбүлүкэтигэр үлэлиир. Бу туһунан кини пресс-сулууспата иһитиннэрэр.

Владимир Владимирович “Биир эргимтэ, биир ситим” диэн норуоттар икки ардыларынааҕы форум чэрчитинэн алтынньы 18 күнүгэр Кытай Народнай Өрөспүүбүлүкэтин премьер-миниистирин Си Цзиньпины кытары көрсөн кэпсэтиэҕэ. Икки дойду лидердэрэ быйыл бу иккис көрсүһүүлэрэ. Кытай премьер-миниистирэ Си Цзиньпин быйыл быыбарын кэнниттэн кулун тутарга тас дойдуларга бастакы командировкатын Москваҕа анаабыта. Манна кэлэн кини Владимир Путины кытары Арассыыйа уонна Кытай бииргэ үлэлээһиннэригэр тирээн турар боппуруостары, ону сэргэ аан дойдуга буола турар быһыы-майгы туһунан кэпсэтэн барбыта.

Владимир Путин форум чэрчитинэн бэҕэһээ, алтынньы 17 күнүгэр, Вьетнам, Лаос, Монголия, Таиланд салайааччыларын кытары көрсүстэ. Санатан эттэххэ, бу форум Кытайга үһүс төгүлүн ыытыллар. Бүтэһигин 2019 сыллаахха буолбута.