Владимир Путин парламеҥҥа Этиитин иһитиннэриэҕэ

РФ бэрэсидиэнэ Владимир Путин олунньу 21 күнүгэр парламеҥҥа Этиитин иһитиннэриэҕэ. Бу туһунан бэҕэһээ бэрэсидьиэн пресс-сэкирэтээрэ Дмитрий Песков суруналыыстары кытары көрсүһүүтүгэр эттэ.

Санатан эттэххэ, Владимир Путин Федерация Сэбиэтигэр бүтэһигин 2021 сыллаахха муус устарга Этиитин иһитиннэрэн турар. Быйыл бу тэрээһиҥҥэ бэрэсидьиэн ордук улахан болҕомтотун уурда. Дмитрий Песков иһитиннэрбитинэн, билигин тэрээһиҥҥэ кэлэр дьон испииһэгэ оҥоһулла сылдьар, тас дойдуттан суруналыыстар кытталлара, кыттыбаттара билиҥҥитэ быһарылла илик. Этии тиэмэтин туһунан иһитиннэрэригэр Дмитрий Сергеевич билигин буола турар быһыыга-майгыга сүрүн болҕомто ууруллуоҕун бэлиэтээтэ.