Владимир Путин Саха сиригэр сырыытын түмүгүнэн сорудахтары бигэргэттэ

Арассыыйа бэрэсидьиэнэ Владимир Путин 2024 сыл бэс ыйын 18 күнүгэр Саха сиригэр сырыытын түмүгүнэн кэккэ сорудахтары бигэргэттэ. Сорудахтар үгүстэрэ социальнай инфраструктура эбийиэктэрин тутууга, креативнай уонна ИТ-индустрияны өйөөһүҥҥэ, каадырдары бэлэмнээһиҥҥэ, мэдиссиинэ уонна үөрэх тэрилтэлэригэр каадырдары тардыы бырагыраамаларын күүһүрдүүгэ сыһыаннаахтар. Судаарыстыба баһылыгын сорудахтарыгар бааллар:

—Саха сиригэр Муусука Үрдүкү оскуолатын саҥа куорпуһун тутуутун түмүктүүр уонна 2025 сылга мусукаалынай үнүстүрүмүөннэри атыылаһар туһугар 2024-2026 сылларга федеральнай бүддьүөттэн сыл аайы үбүлээһини хааччыйарга;
– Оскуола иннинээҕи саастаах оҕолор тэрилтэлэрин иитээччилэригэр уонна эбии үөрэхтээһин тэрилтэлэрин педагогическай үлэһиттэригэр «Тыа сирин учуутала» бырагыраамаҕа көрүллэр төлөбүргэ тэҥнээх, биир кэмнээх толуйар төлөбүрү олохтооһун туһунан боппуруоһу көрөргө;
-Уһук Илиҥҥи федеральнай уокурук мэдиссиинэтин тэрилтэлэригэр каадырдары тардарга «Тыа сирин доктора» уонна «Тыа сирин биэлсэрэ» бырагыраамалар көдьүүстэрин үрдэтэргэ;

– Уһук Илиҥҥэ оҥоһуллубут уонна киинэ быракаатыгар, киинэ бэстибээллэригэр ситиһиилэммит киинэ бородууксуйатын уонна анимационнай бородууксуйаны тарҕатарга судаарыстыбаннай өйөбүл дьаһалларын туһунан боппуруоһу көрөргө;
– Биирдиилээн дьон дохуотугар нолуогу түһэрии параметрдарын оннунан хаалларыыны хааччыйарга (килиимэт ураты усулуобуйалаах сиригэр үлэнэн сибээстээн ааҕыллар оройуоннааҕы коэффициент уонна надбавка);
– Ускуустубаннай интеллект эйгэтигэр чинчийиилэри сайыннарар туһугар Саха сиригэр чахчылары оҥорор киини тэрийэргэ этиилэри киллэрэргэ;
– «Хорус» авиационнай двигателларын мониторинын тиһигин туһаныыны өйөөһүн уонна ону Арассыыйа, омук ырыынактарыгар таһаарыы туһунан боппуруоһу көрөргө;
– Тутууга уонна Дьиэ-уот, коммунальнай хаһаайыстыбатыгар энергетическай көдьүүһү үрдэтэр туһугар Уһук Илиҥҥи федеральнай уокурукка тутуу матырыйаалларын оҥорууга судаарыстыба өйөбүлүн эбии дьаһалларын туһунан боппуруоһу көрөргө;
– Видео-оонньуулары дойдуга оҥорооччулары өйүүргэ федеральнай бүддьүөттэн үбүлээһини көрөргө;
– «Мин идэм -– ИТ» куонкуруһу «Россия -– страна возможностей» платформа тэрээһиннэрин испииһэгэр киллэрии туһунан боппуруоһу көрөргө;
– «Үтүө санаа симфонията» мусукаалынай толоруу норуоттар икки ардыларынааҕы куонкуруһун тэрийэргэ. Маннык көҕүлээһини Муусука үрдүкү оскуолатын үөрэнээччилэрэ оҥорбуттара;
-«Үтүө санаа» мусукаалынай толоруу норуоттар икки ардыларынааҕы куонкуруһун тэрийээччилэргэ көмөлөһөргө;
-Өрөспүүбүлүкэҕэ пилота суох көтөр аппарааттары биир кэлим туһаныы инновационнай киинин тэрийии туһатын туһунан боппуруоһу үөрэтэргэ.

СӨ Ил Дарханын уонна Бырабыыталыстыбатын пресс-сулууспатын матырыйаалынан