Владимир Путин саҥа губернатордары кытары көрсүөҕэ

Дойдубут аҕа баһылыга Владимир Путин бу нэдиэлэҕэ саҥа талыллыбыт губернатордары кытары көрсөн кэпсэтиэҕэ. Балаҕан ыйыгар сүүрбэттэн тахса эрэгийиэҥҥэ губернатордар быыбардара ыытыллыбыта.

Арассыыйа бэрэсидьиэнин пресс-сулууспата иһитиннэрэринэн, бу нэдиэлэҕэ Владимир Путин саҥа талыллыбыт губернатордары кытары көрсүөҕэ. Ону таһынан бырабыыталыстыба, Куттал суох буолуутун сэбиэтин мунньаҕын ыытыаҕа.

Санатан эттэххэ, быйыл биир кэлим куоластааһын күнүгэр сүүрбэ биэс эрэгийиэҥҥэ губернатордар быыбардара ыытыллыбыта. Сүүрбэ биир эрэгийиэн бэйэтин баһылыгын быһаччы куоластаан талбыта. Оттон түөрт субъекка губернатордар парламент нөҥүө быыбардаммыттара. Быыбар түмүгүнэн “Биир ньыгыл Арассыыйа” баартыйа туруорбут хандьыдааттара бары баһылыгынан талыллыбыттара.