Владимир Путин Си Цзиньпины кытта кэпсэттэ

Дойдубут аҕа баһылыга Владимир Путин олунньу 24 күнүгэр Кытай Народнай Өрөспүүбүлүкэтин бэрэссэдээтэлэ Си Цзиньпины кытары төлөпүөнүнэн кэпсэттэ. Бу туһунан бэрэсидьиэн пресс-сулууспата иһитиннэрэр.

Икки дойду лиидэрдэрэ кэпсэтиилэрин кэмигэр экэниэмикэ, атыы-эргиэн, инвестиция, култуура боппуруостарын таарыйдылар. Санатан эттэххэ, быйыл Арассыыйа уонна Кытай култуураларын хардарыта сылларын биллэрэн тураллар. Бу дьаһал чэрчитинэн, икки дойдуга улахан бырагыраама бэлэмнэммитэ.

Владимир Путин Си Цзиньпиҥҥэ Америка Холбоһуктаах Штаттарын кытары кэпсэтии туһунан иһитиннэрдэ. “Кытай Арассыыйа уонна Америка Холбоһуктаах Штаттарын кэпсэтиилэригэр, Украина боппуруоһугар өйөбүл буоларын иһитиннэрдэ”, — диэн суруйар Арассыыйа бэрэсидьиэнин пресс-сулууспата.

Ону таһынан икки дойду бэрэсидьиэннэрэ Улуу Кыайыы 80 сыллаах үбүлүөйдээх бырагырааматын, Шанхайдааҕы бииргэ үлэлэһии саммитын кэпсэттилэр.