Владимир Путин Судаарыстыбаннай Сэбиэт президиумун бигэргэттэ

Арассыыйа Бэрэсидьиэнэ Владимир Путин олунньу 5 күнүнээҕи дьаһалынан Судаарыстыбаннай Сэбиэт президиумун испииһэгин бигэргэттэ. Туһааннаах докумуон бэрэсидьиэн анал саайтыгар таҕыста.

Арассыыйа судаарыстыбаннай сэбиэтин президиумугар барыта 26 киһи киирдэ. РФ бырабыыталыстыбатын бэрэссэдээтэлэ Михаил Мишустин, бэрэсидьиэн көмөлөһөөччүтэ Алексей Дюмин, бэрэсидьиэн дьаһалтатын салайааччытын бастакы солбуйааччы Сергей Кириенко, бэрэсидьиэн дьаһалтатыттан Максим Орешкин, Владимир Симоненко, ону таһынан 17 эрэгийиэн салайааччыта. Испииһэккэ биһиги Ил Дархаммыт Айсен Николаев эмиэ баар. Санатан эттэххэ, кини былырыын от ыйыгар Судаарыстыбаннай Сэбиэккэ энергетика хамыыһыйатын салайааччынан киирбитэ.

Судаарыстыбаннай сэбиэт президиумун састаабыттан вице-премьер Юрий Трутнев, Белгород, Амур, Киров, Курган уобаластарын, Ингушетия, Краснодар кыраайын, Донецкай Норуодунай Өрөспүүбүлүкэ салайааччылара сотулуннулар. Кинилэр 2023 сыллаахха президиум састаабыгар киирбиттэрэ.