Владимир Путин улахан пресс-конференцияларыттан бэлиэтээһиннэр

Арассыыйа бэрэсидьиэнэ Владимир Путин сыл түмүгүн таһаарар улахан пресс-конференцията – бу биһиги дойдубутугар эрэ буолбакка бүтүн аан дойдуга биир бэлиэ түгэн. Былырыыҥҥыттан ыла бу тэрээһин Владимир Владимирович быһа биэриитин кытары тэҥҥэ ыытыллар. Бу икки тэрээһинин 2001 сылтан ыытыллар. Балартан бэлиэ түгэннэри эһиги болҕомтоҕутугар таһаарабыт.

Пресс-конференция историята

Владимир Путин маннык улахан тэрээһинин бэрэсидьиэнинэн талыллан баран аан бастакытын 2001 сыллаахха ыыппыта. Барыта уон алтата ыытыллыбыта. 2005 уонна 2022 сыллаахха пресс-конференция буолбатаҕа. Ону сэргэ Владимир Владимирович премьер-миниистирдиир кэмигэр 2009-2011 сылларга улахан пресс-конференцияны салайбатаҕа. 2020, 2023 сылларга улахан пресс-конференция бэрэсидьиэн сыл түмүгүн таһаарар быһа эпиирин кытары тэҥҥэ ыытыллыбыта. 2020 сыллаах көрсүһүү видео-сибээһинэн барбыта.

Сылы түмүктүүр быһа биэрии историятыттан

Арассыыйа бэрэсидьиэнин кытары быһа биэрии эмиэ 2001 сылтан ыытыллар. 2004, 2012, 2020, 2022 сылларга эрэ ыытыллыбатахтара. Владимир Путин барыта уон аҕыс төгүл нэһилиэнньэни кытары быһа сибээскэ тахсан ыйытыыларга хоруйдаабыта. Ол иһигэр уон түөртэ – бэрэсидьиэнни олорон, түөртэ – премьер-миниистир дуоһунаһыгар.

Быһа биэрии чахчыларыттан

2001 сыллаахха ыытыллыбыт быһа биэрии кэмигэр барыта 400 тыһыынчаттан тахса ыйытыы киирбит эбит буоллаҕына, былырыын икки мөлүйүөнтэн тахса боппуруос киирбит.

Бу бырагыраама уратыта диэн бэрэсидьиэҥҥэ эрэгийиэннэртэн быһа сибээскэ холбонон, тута ыйытыы биэриэхтэрин сөп.

Быһа биэрии ортотунан үс чаас устата барар. Арай 2013 сыллаахха түөрт чаас түөрт уон сэттэ мүнүүтэ барбыта. Бэрэсидьиэн 85 ыйытыыга хоруйдаабыта.

2014 сыллаахха Крым Арассыыйа састаабыгар киирбитинэн, бу боппуруос болҕомто киинигэр турбута. Ону сэргэ бу сылтан саҕалаан ыйытыылары видеоҕа эрдэттэн устан ыытыы диэн киирбитэ.

2016 сылтан социальнай ситимнэр нөҥүө боппуруостары хомуйуу саҕаламмыта.

Саамай элбэх суруналыыс мустар сирэ

Пресс-конференцияҕа, үгэс курдук, Арассыыйа бары эрэгийиэннэриттэн уонна аан дойдуттан үгүс суруналыыс кыттар. Сылтан сыл ахсааннара да элбии турар. 2001 сыллаахха кыттааччы ахсаана 500 эбит буоллаҕына, 2019 сыллаахха барыта 1895 суруналыыс кэлбит.2020-2021 сыллардаахха, дьаҥ- дьаһах туран, кыттааччы ахсаана 774, 507 этэ.

Ханнык боппуруостар киирбиттэрэй?

2000 сыллар саҕаланыыларыгар дойдуга олус уустук кэм этэ. Кавказка Чечняҕа өссө да уоттаах сэрии бара турара, онон сибээстээн олохтоох бэйэни салайыныыга, эрэгийиэннэри кытары үлэҕэ улахан реформа барыахтааҕа. Ону таһынан улахан хампаанньалары Арассыыйа бэйэтигэр ылыыта улахан суолталаах этэ. Онон бу сылларга (2001-2005 сс.) суруналыыстар сүрүннээн дойду иһинээҕи боппуруостарга болҕомотолорун хатаабыттар. 2006 сыллаахха Тутулуга суох нациялар түмсүүлэрин дойдуларын кытары үлэ, тас дойдулары кытары сыһыан, социальнай боппуруостар, национальнай бырайыактар улахан оруолу ылбыттар.

Пресс-конференцияҕа, бэрэсидьиэн быһа биэриитигэр 2013 сыллаахха Украинаны кытары сыһыан, 2014 сыллаахха Крым референдума, Арассыыйа састаабыгар киириитэ, Арассыыйаҕа арҕааҥҥы дойдулар араас хааччаҕы киллэриилэрэ, 2015 сыллаахха Турцияны кытары сыһыан, Сирия боппуруоһа, о.д.а. көтөҕүллүбүттэр. 2016 сыллаахха сүрүннээн экэниэмикэ, бизнес, предпринимательство туһунан боппуруостар сүрүн миэстэни ылбыттар. Оттон 2018 сыллаахха социальнай өрүттээх боппуруостар киирбиттэр.

2021 сыллаахха Владимир Путин Уһук Илиҥҥи федеральнай уокурукка сыһыаран, манна кэлиҥҥи сылларга саҥа үлэ миэстэтэ эбиллибитин, социальнай эбийиэктэр тутуулара хас биирдии эрэгийиэҥҥэ ыытыллалларын, анал кластердар үлэлииллэрин санатан эппит. 2023 сыллаахха пресс-конференция уонна бэрэсидьиэн быһа биэриитэ тэҥҥэ ыытыллыбыта. Манна сүрүн боппуруоһу анал байыаннай операция, тас дойдулары кытары сыһыан ылбыта.

Түмүк

Бу икки тэрээһини, пресс-конференцияны уонна бэрэсидьиэн сыл түмүгүн таһаарар быһа биэриитин, түмэ тардан эттэххэ, бу көрсүһүүлэр дойдуга ханнык, туох боппуруостар сытыытык туралларын кэтээн көрүү биир ньымата буолар.

Тэрээһин бүгүн, ахсынньы 19 күнүгэр, Москва бириэмэтинэн күнүс 12 чааска (Дьокуускай бириэмэтинэн киэһэ 18 чааска) ыытыллыаҕа. Быһа эпиири “Россия 1”, “Первый канал”, “НТВ”, “Россия 24” ханааллар, ону таһынан “Маяк”, “Вести ФМ”, “Радио России радиолар көрдөрүөхтэрэ, иһитиннэриэхтэрэ.

Бэйэҕит ыйытыыларгытын бырагыраама бүтүөр диэри 8-800-200-40-40 төлөпүөнүнэн эрийэн эбэтэр 0-40-40 кылгас иһитиннэрии ыытан биэриэххитин сөп. Ону сэргэ “Москва-Путину.рф”, “Москва-Путину.ру” сайтка, “Одноклассники”, “ВКонтакте” социальнай ситимнэргэ эбэтэр сиэп төлөпүөнүгэр анал сыһыарыы хачайдаан боппуруостаргытын суруйуоххутун сөп.