Владимир Путин уонна Дональд Трамп төлөпүөнүнэн кэпсэттилэр

Арассыыйа көҕүлээһининэн бэҕэһээ Владимир Путин уонна Дональд Трамп ахсыс төгүлүн икки аҥар чаас устата төлөпүөнүнэн кэпсэттилэр.

РИА Новости иһитиннэрэринэн, кэпсэтии сүрүннээн Украина иирсээнин тула барда, Путин буола турар балаһыанньаны сиһилии быһаарда, РФ Сэбилэниилээх Күүстэрэ фронт былаһын тухары инициативаны илиилэригэр тутан олороллорун чуолкайдаата. Итиэннэ бэлитиичэскэй-дипломатическай суолунан бу иирсээни тохтоторго Арассыыйа интэриэстээҕин тоһоҕолоон эттэ.

Трамп да иирсээн тохтууругар интэриэстээҕин, тохтоото да Арассыыйа — АХШ ыккардыгар сүҥкэн экэнэмиичэскэй бииргэ үлэлээһиннэргэ суол арылларыгар эрэлин биллэрдэ.

Кэпсэтиилэргэ, биллэн турар, Томагавкалар бэриллэр кыһалҕаларын таарыйан аастылар. Путин Томагавкалар да кэлэн, фроҥҥа улахан уларыйыыны оҥорботтторун, ол оннугар икки дойду сыһыаннаһыытыгар улахан хоромньу оҥоһулларын хатылаата.

Бүгүн Зеленскэй Эмиэрикэҕэ Трамптыын көрсө, сэрии сэбин, чуолаан Томагавкалары көрдүү тиийдэ. Трамп кинини кытта кэпсэтэрбэр, Арасыыйа бэрэсидьиэнин этиилэрин учуоттуом диэн эттэ. Икки бэрэсидьиэн сибээскэ куруук баар буолуохпут диэн кэпсэтиилэрин түмүктээтилэр.

Инньэ гынан көрсүһүү Венгрия киин куоратыгар Будапешка буолар буолла. Билигин АХШ судаарыстыбаннай сэкирэтээрэ Марко Рубио уонна РФ тас дьыалаларга  миниистирэ Сергей Лавров көрсүһүү тэрээһинигэр, күнүн-дьылын чуолкайдыы сылдьаллар.

Кэпсэтии кэнниттэн, Трамп быһа холуйан көрсүһүү икки нэдиэлэ иһинэн буолуон сөп, Томагавкаларбыт бэйэбитигэр да наадалар, саппааспытын аҕыйатарбыт сатаммат, Арассыыйаны утары саҥа хааччахтааһыннары оҥорорго табыгаһа суох кэм диэбитин “Российскай газета” суруйда.

Оттон аан дойду СМИ-лэрэ Путин уонна Трамп кэпсэтиилэрин кэнниттэн Киев Томагавкалары ыларыгар аны эрэл суох диэн ааҕаллар.

Ол курдук Reuters ааҕыныстыба лиидэрдэр кэпсэтиилэрэ “Киевка аракыаталары биэриини саарбахсытта”, Европа кинилэр саҥаттан көрсүһүүлэрин адьас сөбүлээбэт чинчилээх диир.

SkyNews “бу дипломатическай маневрдар күөннэригэр” АХШ Украинаҕа Томагавкалары биэрэрэ кыаллыбат буолуохтаах, диэн суруйар.

Владимир Путин да ити туһунан кэпсэтии кэмигэр, “Томагавкалар сэрии хонуутугар балаһыанньаны уларытыахтара суоҕа, ол эрээри биһиги дойдуларбыт ыккардыларыгар улахан хоромньу оҥоһуллуо, иирсээни инникитин эйэлээхтик урууллааһын туһунан этиллиэ да суоҕа” диэн муос-таас курдук этэн турар.

Манна даҕатан эттэххэ, Зеленскэй бүгүн АХШ-ка көтөн тиийбитин Эмиэрикэ өттүттэн ким да көрсүбэтэх, трап аттыгар бэйэтин офиһын баһылыга Андрей Ермак уонна арааһа, сөмөлүөтүн экипаһын дьоно көрүстүлэр диэн “Российская газета” суруйар.

Онон дойдубут баһылыга кыл мүччү наадалаах кэпсэтиини оҥоро оҕуста диэн хайгыахха эрэ наада.