Владимир Путиҥҥа 1,6 мөлүйүөн ыйытыы киирбит

«Владимир Путины кытта сылы ырытыы» биэриигэ,  ахсынньы 16 күнүнээҕи туругунан, 1,6 мөлүйүөнтэн тахса ыйытыы киирбит. 

Гражданнар ыйытыыларын саамай тарҕаммыт көрүҥнэринэн социальнай бэлиитикэ, инфраструктура, бырабыыталыстыба уонна уопсастыба,  дьиэ-уот, олох-дьаһах боппуруостара буолаллар. Социальнай бэлиитикэҕэ саамай тарҕаммыт тиэмэлэр —  биэнсийэ, дьиэ кэргэн уонна оҕо, босуобуйа, инбэлииттэргэ көмө, субсидия уонна страховка.

Биэриигэ ыйытыылары хомуйуу ахсынньы  саҥатыттан саҕаламмыта уонна ахсынньы 19 күнүгэр, Дьокуускай бириэмэтинэн киэһэ 8 чааска буолар биэрии бүтүөр диэри ылаллар.

Быйыл, былырыыҥҥы курдук, ыйытыылары Сбербаан «Гига Чата»  быһааран биэриэҕэ.

Ыйытыылары MAX национальнай платформаҕа баар чатбот нөҥүө, ону тэҥэ «ВКонтакте» социальнай ситимҥэ ыытыаххытын сөп. Ыйытыылары өссө moskva-putinu.ru саайтка уонна «Одноклассники» социальнай ситимҥэ ылыахтара.

Судаарыстыба баһылыгар 8-800-200-40-40 нүөмэргэ эрийэн, эбэтэр 0-40-40 нүөмэргэ смс, ммс ыытан, ыйытыаххытын сөп.