Владимир Путины өйөөн, илии баттааһынын хомуйуу саҕаланна

Ахсынньы 23 күнүгэр Саха сиригэр Владимир Путин бэрэсидьиэн быыбарыгар хандьыдаатынан турунарын өйүүргэ илии баттааһынын хомуйуу саҕаланна.  Илии баттааһынын хомуйар пуун «Столица» эргиэн киинигэр баар (Ленин пр., 16 №-рэ).

Бу пуун «Общероссийский народный фронт» салаатыгар аһыллыбыт.

— Биһиги бэрэсидьиэн Владимир Путин биһиги дойдубут, биһиги өрөспүүбүлүкэбит туһугар оҥорбутун, оҥорорун барытын сыаналыыбыт. Онон кини аан дойдуга уонна дойду иһигэр ыытар бэлиитикэтигэр итэҕэйэбит, киниэхэ өйөбүлбүтүн биллэриэхпитин баҕарабыт, — диэн ОНФ өрөспүүбүлүкэтээҕи исполкомун салайааччы Валерий Лютай эттэ.

Владимир Путин баартыйаттан буолбакка, бэйэтин туруорунна. Онон, сокуон ирдэбилинэн, кини 300 тыһыынчаттан итэҕэһэ суох илии баттааһынын хомуйуохтаах.

Дьокуускайга илии баттааһынын хомуйар пууҥҥа ОНФ эдэр актыбыыстара үлэлииллэр. Кинилэр кылгас бэлэмнэниини баран, илии баттыахтарын баҕарар дьоҥҥо көмөлөһөллөр. Ким баҕарар пааспарын илдьэ кэлэн,  илии баттыан сөп.

Владимир Путины өйүүргэ илии баттааһынын хомуйуу ый кэриҥэ барыаҕа. Пуун күн аайы, өрөбүлэ суох, сарсыарда 10 чаастан киэһэ 8 чааска диэри үлэлиир.

Ил Дархан, бырабыыталыстыба дьаһалтатын пресс-сулууспата.