Владимир Путины кытта быһа лииньийэ ахсынньы 19 күнүгэр буолуоҕа

Ахсынньы 19 күнүгэр Арассыыйа Бэрэсидьиэнэ Владимир Путин сыллааҕы түмүктэри таһаарар быһа лииньийэтэ улахан пресс-кэмпириэнсийэни кытта тэҥинэн ыытыллыаҕа. Бу туһунан Кириэмил пресс-сулууспата иһитиннэрдэ.

«Ахсынньы 19 күнүгэр, Москва бириэмэтинэн күнүс 12:00 чааска (олохтоох бириэмэнэн киэһэ 18:00 чаастан), «Владимир Путины кытта сыл түмүктэрэ» диэн бырагыраама быһа эпииргэ тахсыаҕа. Дойду Бэрэсидьиэнэ ааһан эрэр сыл түмүктэрин таһаарыа, ону тэҥэ суруналыыстар уонна дойдубут олохтоохторун ыйытыыларыгар хоруйдуоҕа», — диэн официальнай иһитиннэриигэ этиллэр.

Тэрээһин дойду олоҕор биир сүрүн түгэн. Ол курдук, дойду баһылыга быһаччы олохтоохтортон киирбит ыйытыыларга хоруйдаан, дьону долгутар кыһалҕалары быһаарар, дойду сайдыытын туһунан санаатын үллэстэр. Саха сирин олохтоохторо эмиэ бу быһа эпииргэ көхтөөхтүк кыттар кыахтаахтар.

Ыйытыылары хайдах биэриэххэ сөбүй?

Ыйытыылары ылыы ахсынньы 4 күнүттэн саҕаламмыта уонна ахсынньы 19 күнүгэр бырагыраама бүтүөр диэри салҕаныаҕа. Ыйытыыгытын хас да ньыманан ыытыаххытын сөп:

1. Официальнай саайт нөҥүө: moskva-putinu.ru саайтка киирэн, анал форманы толорон ыйытыыгытын суруйуоххутун сөп.
2. SMS эбэтэр MMS-нан: 0-40-40 кылгас нүөмэргэ тиэкиһинэн эбэтэр хаартыскалаах ыйытыы ыытар кыах баар. (Арассыыйа иһинээҕи оператордартан босхо).
3. Төлөпүөнүнэн: 8-800-200-40-40 нүөмэргэ эрийэн ыйытыыгытын биэриэххитин сөп. (Арассыыйа иһинэн эрийии босхо).
4. Социальнай ситимнэринэн: «ВКонтакте» уонна «Одноклассники» социальнай ситимнэригэр анал бөлөхтөр нөҥүө тиэкис эбэтэр видео-ыйытыы ыытыахха сөп.
5. MAX мессенджер нөҥүө: «MAX» мессенджергэ анал чат-бот нөҥүө ыйытыы ыытар ньыма баар: max.ru/moskvaputinu.

Хас биирдии киһи бэйэтин эрэ буолбакка, дэриэбинэтин, улууһун, өрөспүүбүлүкэтин аатыттан туруорсуон, кыһалҕалаах боппуруоһу көтөҕүөн сөп. Онон, бу кыаҕы мүлчү туппакка, дойду олоҕор көхтөөхтүк кыттаргытыгар ыҥыраллар.