Владимир Шаповалов: «Уһук Илиҥҥэ тыҥааһыннаах быһыы-майгы уонна нуорманы кэһии тахсыбата»

МПГУ Устуоруйаҕа уонна бэлиитикэҕэ институтун дириэктэрин солбуйааччы Владимир Шаповалов бэлиэтээбитинэн, Уһук Илин уокурукка эрэгийиэннэр баһылыктарын уонна сокуону оҥорор мунньахтарын дьокутааттарын быыбарыгар куоластааһыны бүтүннүү хонтуруоллааһын хааччылынна, онон уокурук куоластааһынын устуоруйатыгар саамай аһаҕас уонна дьэҥкир быыбар быһыытынан киириэн сөп.

Быыбар хамыыһыйатын 15 тыһыынчаттан тахса үөрэхтээх кэтээн көрөөччүлэр кыраҕы харахтарынан маныыллар.

Маннык кэтэбил быыбардыыр кэмҥэ кыра даҕаны кэһии тахсыбытын быһаарарга көмөлөһөр диэн эспиэр этэр.

«Бэрэбиэркэ түмгүнэн, үгүс үҥсүүлэр бигэргэммэтилэр уонна олоҕо суох (фейк) сурах-садьык быһыытынан билиниллэллэр. Кыра үҥсүүлэр тиэхэньиичэскэй кыһалҕаҕа сыһыаннаахтар, олор тута быһаарыллаллар,» — диэн этэр Владимир Шаповалов.

Ол иһигэр Саха сиригэр кэккэ быыбардыыр учаастактарга уоту-күөһү араарыы уонна сибээс барыытын холобурдара бааллар. Быыбар хамыыһыйаларын үлэлэрин тохтоппот туһуттан тута солбук источниктары, генератордары холбонон, үлэ салҕанна. Саха сирин Хаптаҕай сэлиэнньэтигэр «Сиэрдээх Арассыыйа» хандьыдаат баартыйаттан Территориальнай быыбардыыр хамыыһыйаҕа кэтээн көрөөччүлэрин испииһэгин биэрбэккэ быыбар учаастагар киирэллэрэ хаччахтана сырытта. Алҕас тута быһаарыллан, «Сиэрдээх Арассыыйа» хандьыдаатын кэтээн көрөөччүлэрэ быыбардыыр учаастагар киирэн кэтиир үлэлэрин саҕалаатылар.

Информационнай куттал суох буолуутун Уһук Илин уокурук эрэгийиэннэрин киберволонтердара хонтуруоллуллар.

«Кинилэр икки күн иһигэр, тас дойдуттан быыбары ыһа сатыыр 20 информационнай атаака оҥоһуллубутун бэлиэтээтилэр», — диэн этэр эспиэр.